Bul týraly KTK habarlaidy.
Qandyqol qylmystan keiin saýdaǵa shyǵýǵa júregi shailyǵyp qalǵan saýdagerler osylai dep otyr. Olar Uzynaǵashtaǵy mal bazaryn urylardyń burynnan jaǵalap júrgenin aitady. Sýyq qoldylardyń qunyqqany sonsha, tórt túlikten túsken qyrýar qarjyny árbir saýda saiyn qaǵyp ákete beredi eken. Al sońǵy ret qaraqshylardyń maldy iesimen qosa urlap ketkeni málim.
Máiiti taýda tabylǵan úsh aǵaiyndy – Jarqynbek, Qadilbek jáne Muqiiat sońǵy ret osy bazardan ketken. Qazir munda mal saýdagerleriniń iri qaramen kelýge júrekteri shailyǵyp qalǵan. Óitkeni urylar tym erkinsinip ketipti. Sebebi, sol aǵaiyndylar joǵalar kúni munda taǵy 15 tuiaq urlanǵan.
Aǵaiyndylarmen birge mal saýdasymen ainalysqandar munda ár bazar bolǵan saiyn ury-qary qaryq bolyp qaitady deidi. Onda da millondap oljalaidy eken.
Saýdagerlerdiń aitýynsha, Uzynaǵashtaǵy mal bazarynda aqshasyn urlatpaǵan adam joq eken. Politsiiaǵa shaǵymdanǵanymen, birde-birin taýyp bermegen. Aqyry qolyn bir siltep, aryz jazýdy da qoiypty.
Soraqysy sol, bul oqiǵalardyń biri de kameraǵa túspegen.
Qyryq bas siyrmen joǵalyp, artynsha óligi tabylǵan úsh birdei arystai azamat Jarqynbek, Qadilbek, Muqiiat sońǵy ret osy bazarda saýda jasap turypty. Sońǵy ret ol kisilerdi kýágerler senbi kúni tańǵy segizde kórgen, al kúndizgi saǵat 11-lerde siyrlar tielgen júk kóligi bazardan syrtqa shyǵyp ketken. Biraq ókinishke qarai bazar aýzynda turǵan 6 birdei kameraǵa ol úsh azamat ta olardyń siyrlary da, olardy alyp ketken kúdiktilerdiń biri de túspepti.
Kameraǵa túspegenimen, kúdiktilerdiń biri – Talǵat degendi saýdagerler tanyp qoiypty.
Aǵaiyndylardyń óliminen keiinde mal bazarynda saqtyq sharalary kúsheitilmepti. Esesine, árbir mal basyna, ony alyp kelgen kólikke de 700 teńgeden salyq jinalady eken.
