Bul týraly Baq.kz redaksıasyna qaza bolǵan jigitterdiń biriniń týǵan aǵasy Adal Zarlyhan habarlady.

Oqıǵa kýágerlerimen bir-birlep sóılesken Adal Zarlyhan ótkendegi izdeý jumystary kezindegi oqıǵalardy esine ala otyryp, bylaı baıandady:

«Polıseılerden esh habar bolmaǵan soń, janyma birneshe jigit alyp, jol talǵamaıtyn kólikpen inilerimdi ózim izdeýge shyqtym. 23 qyrkúıekte Jambyl oblysy Degeres aýyly mańynan ekinshi mashına tabyldy.

Bul jaıynda bizge qytaıdan kóship kelgen beıtanys oralman jigit habarlady. Ol mal satyp júrgen jigitterdiń joǵalǵanyn, polıseılermen birge eriktilerdiń de izdep jatqanyn ınternetten oqyǵan. Uzynaǵash jaqqa kele jatyp, jolshybaı ıesiz turǵan kólikti fotoǵa túsirip alypty. Sosyn tileýlestik nıetpen bizge habarlap, vatsappen fotosyn jiberdi. Estı sala, tańǵy bes mólsherinde polıseılermen birge mashına turǵan aýylǵa bardyq. Ony ózge eki polıseı kúzetip tur eken.

Kólikti kórgenin alǵash bizge habarlaǵan álgi jigit, «keshe keshte óziniń bir tanysynyń mal tıep kele jatyp, buzylyp, otalmaı qalǵan bir júk kóligin jóndep bergenin» aıtyp, ol adamnyń telefon nómirin berdi. Biz álgi adamǵa habarlasyp, kezdestik.

Onyń aıtýynsha: «buryn polısıa qyzmetkeri bolǵan bir jigit kelip, mashınalary buzylyp qalǵanyn, jóndep berýin ótinip, sol jaqqa ertip bardy. Kólik qasyna barsam taǵy eki adam júr eken. Kólik ıesi solar eken dep oıladym da, mashınalaryn jóndep, otaldyryp berdim. Qytaıdan kelgen jigitterdi sóz láminen bylaı tanımyn ǵoı. Ol eki jigit maǵan jergilikti qazaqtar sıaqty kórindi. Men kelerden buryn olar buzylǵan mashınany súıretpekshi bolyp, traktor shaqyrǵan eken. Ol adam da bizben birge boldy. Álgi kóliktiń buzylǵan jerin jóndep bolǵan soń, mashınaǵa asyǵys otyrǵan olar kólikti ornynan qozǵap qalǵanda, jol jıegine jaqyn turǵan traktordy soǵyp, aýdaryp tastady. Ol jerde traktor ıesi ana jigitterge renjip, óziniń aýdarylǵan traktoryn súırep turǵyzý úshin taǵy bir adamdarǵa habarlasyp jatty. Kólikterin jóndep berip, negizgi sharýam bitken soń men úıime qaıtyp kettim» dedi».

Sonymen qosa Adal Zarlyhan BAQ ókilderi men eriktilerdiń, ózge de belsendi azamattardyń aralasýymen qoǵamda zor dúmpý týdyrǵan bul oqıǵa barysynda polıseılerdiń tym sylbyr qımyldaǵanyn, tipti, ózderine jekip, úılerine qaıtaryp jibermek bolǵanyn da ashyq aıtty.

Taǵy bir kýágerler Degeresten tabylǵan júk kóliginiń túnde joǵaryda aıtylǵan polısıa qyzmetkeriniń úıinde turǵanyn, ertesinde alys jaqqa ıenge áldebireýderdiń aparyp tastaǵanyn da aıtady deıdi — ol.

Biraq, bul jaıynda ishki ister organdary resmı túsinikteme bergen joq.