ۇزىناعاش بازارىندا مال ساتىپ ءجۇرىپ جوعالىپ، سوڭىندا قىلمىسكەرلەر قولىنان قازا تاپقان ءۇش جىگىتتىڭ ولىمىنە بۇرىنعى پوليسيا قىزمەتكەرىنىڭ قاتىسى بار بولۋى مۇمكىن.
بۇل تۋرالى Baq.kz رەداكسياسىنا قازا بولعان جىگىتتەردىڭ ءبىرىنىڭ تۋعان اعاسى ادال زارلىحان حابارلادى.
وقيعا كۋاگەرلەرىمەن بىر-بىرلەپ سويلەسكەن ادال زارلىحان وتكەندەگى ىزدەۋ جۇمىستارى كەزىندەگى وقيعالاردى ەسىنە الا وتىرىپ، بىلاي باياندادى:
«پوليسەيلەردەن ەش حابار بولماعان سوڭ، جانىما بىرنەشە جىگىت الىپ، جول تالعامايتىن كولىكپەن ىنىلەرىمدى ءوزىم ىزدەۋگە شىقتىم. 23 قىركۇيەكتە جامبىل وبلىسى دەگەرەس اۋىلى ماڭىنان ەكىنشى ماشينا تابىلدى.
بۇل جايىندا بىزگە قىتايدان كوشىپ كەلگەن بەيتانىس ورالمان جىگىت حابارلادى. ول مال ساتىپ جۇرگەن جىگىتتەردىڭ جوعالعانىن، پوليسەيلەرمەن بىرگە ەرىكتىلەردىڭ دە ىزدەپ جاتقانىن ينتەرنەتتەن وقىعان. ۇزىناعاش جاققا كەلە جاتىپ، جولشىباي يەسىز تۇرعان كولىكتى فوتوعا ءتۇسىرىپ الىپتى. سوسىن تىلەۋلەستىك نيەتپەن بىزگە حابارلاپ، ۆاتساپپەن فوتوسىن جىبەردى. ەستي سالا، تاڭعى بەس مولشەرىندە پوليسەيلەرمەن بىرگە ماشينا تۇرعان اۋىلعا باردىق. ونى وزگە ەكى پوليسەي كۇزەتىپ تۇر ەكەن.
كولىكتى كورگەنىن العاش بىزگە حابارلاعان الگى جىگىت، «كەشە كەشتە ءوزىنىڭ ءبىر تانىسىنىڭ مال تيەپ كەلە جاتىپ، بۇزىلىپ، وتالماي قالعان ءبىر جۇك كولىگىن جوندەپ بەرگەنىن» ايتىپ، ول ادامنىڭ تەلەفون ءنومىرىن بەردى. ءبىز الگى ادامعا حابارلاسىپ، كەزدەستىك.
ونىڭ ايتۋىنشا: «بۇرىن پوليسيا قىزمەتكەرى بولعان ءبىر جىگىت كەلىپ، ماشينالارى بۇزىلىپ قالعانىن، جوندەپ بەرۋىن ءوتىنىپ، سول جاققا ەرتىپ باردى. كولىك قاسىنا بارسام تاعى ەكى ادام ءجۇر ەكەن. كولىك يەسى سولار ەكەن دەپ ويلادىم دا، ماشينالارىن جوندەپ، وتالدىرىپ بەردىم. قىتايدان كەلگەن جىگىتتەردى ءسوز لامىنەن بىلاي تانيمىن عوي. ول ەكى جىگىت ماعان جەرگىلىكتى قازاقتار سياقتى كورىندى. مەن كەلەردەن بۇرىن ولار بۇزىلعان ماشينانى سۇيرەتپەكشى بولىپ، تراكتور شاقىرعان ەكەن. ول ادام دا بىزبەن بىرگە بولدى. الگى كولىكتىڭ بۇزىلعان جەرىن جوندەپ بولعان سوڭ، ماشيناعا اسىعىس وتىرعان ولار كولىكتى ورنىنان قوزعاپ قالعاندا، جول جيەگىنە جاقىن تۇرعان تراكتوردى سوعىپ، اۋدارىپ تاستادى. ول جەردە تراكتور يەسى انا جىگىتتەرگە رەنجىپ، ءوزىنىڭ اۋدارىلعان تراكتورىن سۇيرەپ تۇرعىزۋ ءۇشىن تاعى ءبىر ادامدارعا حابارلاسىپ جاتتى. كولىكتەرىن جوندەپ بەرىپ، نەگىزگى شارۋام بىتكەن سوڭ مەن ۇيىمە قايتىپ كەتتىم» دەدى».
سونىمەن قوسا ادال زارلىحان ب ا ق وكىلدەرى مەن ەرىكتىلەردىڭ، وزگە دە بەلسەندى ازاماتتاردىڭ ارالاسۋىمەن قوعامدا زور ءدۇمپۋ تۋدىرعان بۇل وقيعا بارىسىندا پوليسەيلەردىڭ تىم سىلبىر قيمىلداعانىن، ءتىپتى، وزدەرىنە جەكىپ، ۇيلەرىنە قايتارىپ جىبەرمەك بولعانىن دا اشىق ايتتى.
تاعى ءبىر كۋاگەرلەر دەگەرەستەن تابىلعان جۇك كولىگىنىڭ تۇندە جوعارىدا ايتىلعان پوليسيا قىزمەتكەرىنىڭ ۇيىندە تۇرعانىن، ەرتەسىندە الىس جاققا يەنگە الدەبىرەۋدەردىڭ اپارىپ تاستاعانىن دا ايتادى دەيدى — ول.
ءبىراق، بۇل جايىندا ىشكى ىستەر ورگاندارى رەسمي تۇسىنىكتەمە بەرگەن جوق.
