«Máıitterdi áli bizge bergen joq. Tústen keıin beredi dep otyr. Qazir máıithanadamyz», - dedi Zarlyhanuly Muqıat pen Álimhan Qadylbektiń aǵaıyny Tursyn Álimhan.
Sonymen qatar, Tursyn Álimhanuly kúdiktilerdiń marqumdardy burynnan tanýy múmkin degen aqparatty joq shyǵardy.
«Saýdany marqumdar eshkimmen birigip jasaǵan joq. Ózderiniń mańdaı teri, adal eńbegi edi. Úsheýiniń artynda 9 bala jetim qaldy», - dedi Tursyn Álimhan.
Aıta keteıik, áleýmettik jelilerde kúdiktilerdiń olardy tanýy múmkin degen aqparat taraǵan edi.
Eske sala keteıik, ótken jeksenbide BAQ-ta Almaty oblysy Jambyl aýdanynda mal saýdasymen aınalysyp júrgen úsh jigittiń joǵalyp ketkeni týraly habarlanǵan bolatyn.
Marqumdardyń týysqandarynyń aıtýynsha, Doldanuly Jarqynbek (1979 jyly týǵan), Zarlyhanuly Muqıat (1973 jyly týǵan), Álimhan Qadylbek Shyǵys Qazaqstan oblysynyń Tarbaǵataı aýdanynan satyp alǵan 40 bas maldy eki júk kóligimen 17 qyrkúıek kúni Uzynaǵash bazaryna shyǵarǵan. 19 qyrkúıekte sońǵy ret baılanysqa shyqqan. Birneshe kúnnen keıin olardyń denesi tabyldy.
24 qyrkúıekte Almaty oblystyq İshki ister departamentiniń baspasóz qyzmeti iz-túzsiz joǵalǵan úsh aǵaıyndynyń ólimine qatysty kúdiktiler ustalǵanyn habarlady.
«Oblystyq İİD basshysynyń birinshi orynbasary podpolkovnık Nurlan Másimov basshylyq etken izdeý sharalaryna aýdandyq jáne aımaqtyq polıseıler de jumyldyryldy. Joǵalǵandardy óltirdi degen kúdikpen Jambyl aýdanynyń eki azamaty ustaldy. Jábirlenýshilerdiń deneleri tabyldy. QR QK 99-baby, 2-bólimi boıynsha (Kisi óltirý) qylmystyq is qozǵaldy», - delingen baspasóz qyzmetiniń habarynda.
Kisi óltirý faktisi boıynsha tergeý jumystary Almaty oblystyq İshki ister departamenti basshylyǵynyń qatań baqylaýyna alynǵan.
