Aqtóbe oblysynda úilenbek bolǵan qyzyn zorlap, óltirip, qashyp ketken er adam 22 jylǵa sottaldy, – dep habarlaidy Dalanews.kz.
Is Aqtóbe oblysynyń qylmystyq ister jónindegi mamandandyrylǵan aýdanaralyq sotynda qaraldy.
Sotta kúdikti E. esimdi er adam 2024 jyldyń 22 sáýirinde Aqtóbe qalasynda túngi mezgilde úige zańsyz kirip, jábirlenýshi T-ny erkinen tys zorlap, artynsha qylmys izin jasyrý maqsatynda ony pyshaqtap, óltirip ketkeni anyqtaldy. Ol balkon arqyly shyǵyp, qashyp bara jatqanda aldynan politsiia qyzmetkeri shyqqan. Kúdikti er adam politseidi de pyshaqpen jaraqattaǵan.
Sottalýshy E. ózine taǵylǵan aiyp boiynsha kinásin ishinara moiyndap, úilengisi kelip júrgen qyzynyń páterine túnde balkon arqyly kirip, ashý ústinde ony óltirip alǵanyn, qyzdy zorlamaǵanyn, al artynan qýǵan adamnyń politsiia qyzmetkeri ekenin bilmegenin aitqan.
Prokýror taǵylǵan aiypty tolyqtai qoldap, sottan E-ge 24 jyl bas bostandyǵynan aiyrý jazasyn taǵaiyndaýdy surady.
Jaza taǵaiyndaý barysynda qylmystyq jaýaptylyq pen jazany jeńildetetin mán-jai retinde sottalýshy E. buryn qylmystyq jaýaptylyqqa tartylmaǵany tanyldy. Sottalýshy E. qylmystyq jaýaptylyǵy men jazasyn aýyrlatatyn mán-jailar anyqtalǵan joq.
Sot kúdiktini QK-niń 99-babynyń 2-bóliginiń 10-tarmaǵymen, 120-babynyń 2-bóliginiń 2-tarmaǵymen, 149-babynyń 2-bóligimen, 380-1-babynyń 1-bóligimen kináli dep tanyp, oǵan túpkilikti 22 jyl merzimge bas bostandyǵynan aiyrý jazasyn taǵaiyndady. Sottalǵannan jábirlenýshiniń paidasyna moraldyq ziian úshin ótemaqy jáne múliktik shyǵyndary óndirildi.
Sot úkimi zańdy kúshine engen joq.
