Eks ministr Qýandyq Bishimbaevtyń marqum áieli Saltanat Núkenovanyń aǵasy Aitbek Amangeldi qaryndasy men enesiniń qarym-qatynasy qandai bolǵanyn aitty, - dep habarlaidy Dalanews.kz.
«Qarym-qatynastary jaqsy bolatyn. Tipti «Saltanat, sen úi de jinamai-aq qoi, tamaq ta jasama. Seniń basty mindetiń – sulý bolyp júrý. Júr, dúken aralap keleiik» deitin. Iaǵni eshqandai problema bolmaityn. Olar bir turǵyn úide, ártúrli páterde turǵan. Saltanat enesin jii shai ishýge shaqyryp turatyn. Biraq sol úshin de ursysyp qalatyn. Qýandyqqa anasy jii keletini unamaityn. Men, kerisinshe, meniń jaqyndarym jaqsy aralassa qýanar edim. Árine, Saltanat turmysqa shyqqannan keiin otbasylyq ómirge kóbirek nazar aýdara bastady», - deidi Aitbek Amangeldi.
Onyń sózinshe, bastapqyda Saltanatqa otbasylyq ómir unaityn. Sonymen qatar, Saltanattyń aǵasy Bishimbaevtardyń otbasymen Jańa jyldy qarsy alǵan kezin eske aldy.
«2023 jańa jylyn Saltanattyń jańa otbasymen birge qarsy aldym. Shynymdy aitsam, bul bir jabaiy jańa jyl boldy. Sol keshte Bishimbaevtyń otbasyna degen agressiiasyn alǵash ret kórdim.
Jańa jyldyq keshte Qýandyq Bishimbaevtyń inisi Baqytjan da boldy, áielimen kelgen eken. Olar qonaqqa kelgendikten Saltanatqa syilyq ákelgen kórinedi, al týra sol ýaqytta Saltanattyń qolynda daiyn syilyǵy bolmai, Qýandyq syilaǵan átirdi bergen. Qýandyq buǵan ashýlanyp, "bul meniń saǵan syilyǵym edi, qalai dátiń bardy? Meniń syilyǵym bolǵandyqtan, onyń taǵdyryn da men sheshemin" dedi. Bári bir dastarhan basynda otyryp, Bishimbaev pen Saltanattyń arasyndaǵy janjaldy kórip, Qýandyqtyń ata-anasy da aralasa bastady. Sonda Qýandyq aýyr sózder aityp, anasynyń da, ákesiniń de aýzyn jaýyp tastady. Men balanyń ata-anasymen mundai qarym-qatynasyna tańǵalyp otyrdym. Keiin jańa jyldy qarsy alǵannan keiin men ketip qaldym.
Men birneshe kúnde Almatyǵa qaitatyn bolǵandyqtan, Saltanatqa 1 qańtarda "kezdeseiik, kofe iship qaitaiyq, túndegi jaǵdai meni ýaiymdatyp tur, habarda bol" dep jazdym. Sóitsem, Qýandyq men ketkennen keiin ata-anasy, kishkentai balalar, bári tamaqtanyp otyrǵan ústeldi tamaǵy, ydysymen qosa tóńkerip jibergen eken", - dedi Aitbek Amangeldi.
Eske salaiyq, atyshýly oqiǵa 2023 jylǵy 9 qarashada Astana meiramhanalarynyń birinde boldy. Saldarynan burynǵy ulttyq ekonomika ministri Qýandyq Bishimbaevtyń áieli Saltanat Núkenova qaitys boldy. Al eks-shendi qamaýda otyr.
