ەكس مينيستر قۋاندىق بيشىمبايەۆتىڭ مارقۇم ايەلى سالتانات نۇكەنوۆانىڭ اعاسى ايتبەك امانگەلدى قارىنداسى مەن ەنەسىنىڭ قارىم-قاتىناسى قانداي بولعانىن ايتتى، - دەپ حابارلايدى Dalanews.kz.

«قارىم-قاتىناستارى جاقسى بولاتىن. ءتىپتى «سالتانات، سەن ءۇي دە جيناماي-اق قوي، تاماق تا جاساما. سەنىڭ باستى مىندەتىڭ – سۇلۋ بولىپ ءجۇرۋ. ءجۇر، دۇكەن ارالاپ كەلەيىك» دەيتىن. ياعني ەشقانداي پروبلەما بولمايتىن. ولار ءبىر تۇرعىن ۇيدە، ءارتۇرلى پاتەردە تۇرعان. سالتانات ەنەسىن ءجيى شاي ىشۋگە شاقىرىپ تۇراتىن. ءبىراق سول ءۇشىن دە ۇرسىسىپ قالاتىن. قۋاندىققا اناسى ءجيى كەلەتىنى ۇنامايتىن. مەن، كەرىسىنشە، مەنىڭ جاقىندارىم جاقسى ارالاسسا قۋانار ەدىم. ارينە، سالتانات تۇرمىسقا شىققاننان كەيىن وتباسىلىق ومىرگە كوبىرەك نازار اۋدارا باستادى»، - دەيدى ايتبەك امانگەلدى.

ونىڭ سوزىنشە، باستاپقىدا سالتاناتقا وتباسىلىق ءومىر ۇنايتىن. سونىمەن قاتار، سالتاناتتىڭ اعاسى بيشىمبايەۆتاردىڭ وتباسىمەن جاڭا جىلدى قارسى العان كەزىن ەسكە الدى.

«2023 جاڭا جىلىن سالتاناتتىڭ جاڭا وتباسىمەن بىرگە قارسى الدىم. شىنىمدى ايتسام، بۇل ءبىر جابايى جاڭا جىل بولدى. سول كەشتە بيشىمبايەۆتىڭ وتباسىنا دەگەن اگرەسسياسىن العاش رەت كوردىم. 

جاڭا جىلدىق كەشتە قۋاندىق بيشىمبايەۆتىڭ ءىنىسى باقىتجان دا بولدى، ايەلىمەن كەلگەن ەكەن. ولار قوناققا كەلگەندىكتەن سالتاناتقا سىيلىق اكەلگەن كورىنەدى، ال تۋرا سول ۋاقىتتا سالتاناتتىڭ قولىندا دايىن سىيلىعى بولماي، قۋاندىق سىيلاعان ءاتىردى بەرگەن. قۋاندىق بۇعان اشۋلانىپ، "بۇل مەنىڭ ساعان سىيلىعىم ەدى، قالاي ءداتىڭ باردى؟ مەنىڭ سىيلىعىم بولعاندىقتان، ونىڭ تاعدىرىن دا مەن شەشەمىن" دەدى. ءبارى ءبىر داستارحان باسىندا وتىرىپ، بيشىمبايەۆ پەن سالتاناتتىڭ اراسىنداعى جانجالدى كورىپ، قۋاندىقتىڭ اتا-اناسى دا ارالاسا باستادى. سوندا قۋاندىق اۋىر سوزدەر ايتىپ، اناسىنىڭ دا، اكەسىنىڭ دە اۋزىن جاۋىپ تاستادى. مەن بالانىڭ اتا-اناسىمەن مۇنداي قارىم-قاتىناسىنا تاڭعالىپ وتىردىم. كەيىن جاڭا جىلدى قارسى العاننان كەيىن مەن كەتىپ قالدىم.

مەن بىرنەشە كۇندە الماتىعا قايتاتىن بولعاندىقتان، سالتاناتقا 1 قاڭتاردا "كەزدەسەيىك، كوفە ءىشىپ قايتايىق، تۇندەگى جاعداي مەنى ۋايىمداتىپ تۇر، حاباردا بول" دەپ جازدىم. سويتسەم، قۋاندىق مەن كەتكەننەن كەيىن اتا-اناسى، كىشكەنتاي بالالار، ءبارى تاماقتانىپ وتىرعان ۇستەلدى تاماعى، ىدىسىمەن قوسا توڭكەرىپ جىبەرگەن ەكەن"، - دەدى ايتبەك امانگەلدى.  

ەسكە سالايىق، اتىشۋلى وقيعا 2023 جىلعى 9 قاراشادا استانا مەيرامحانالارىنىڭ بىرىندە بولدى. سالدارىنان بۇرىنعى ۇلتتىق ەكونوميكا ءمينيسترى قۋاندىق بيشىمبايەۆتىڭ ايەلى سالتانات نۇكەنوۆا قايتىس بولدى. ال ەكس-شەندى قاماۋدا وتىر.