Jýrnalister Eńbek jáne halyqty áleýmettik qorǵaý ministri Birjan Nurymbetovtan nege bulai dep suraǵanda:
"Memlekettik járdemaqy tabysyna qaramastan barlyq kópbalaly otbasyna beriledi. Ár balaǵa orta eseppen alǵanda 10 600 teńge tóleý josparlanǵan. Qazyna qarjysynyń múmkindigin eskere otyryp, ázirshe 7 jáne odan kóp balasy bar otbasylarǵa 73 370 teńge tólegen durys dep otyrmyz", – dep jaýap berdi.
Ministr "ázirshe" degen sózdi keler kúnnen úmittenip aitqan syńaily.
Sebebi taiaýda ol bala sany jetiden asatyn otbasylarǵa memlekettik járdemaqy qaita esepteletinin málimdedi.
"Qańtar aiynan bastap kópbalaly otbasylarǵa saralanǵan memlekettik járdemaqy taǵaiyndaldy. Ár balaǵa 10 600 teńgeden qarastyryldy. Kópbalaly otbasy degen uǵymdy 7 balamen shektemeý máselesin depýtattarmen birlesip talqylaǵan kezde osyǵan deiin qabyldanǵan zańǵa ózgeris engizý bastamasyn qoldadyq. Úkimet tiisti ózgerister engizgennen keiin, qujat Parlamenttiń qaraýyna usynylady. Jobalap aitatyn bolsam, aldaǵy ýaqytta 8 balaǵa - 85 myń, 9 balaǵa - 96 myń, 15 balaǵa - 160 myń teńge memlekettik járdemaqy beriledi. Tiisti qarajat qarastyryldy", – dedi Birjan Nurymbetov.
Onyń sózinshe, elimizde kópbalaly 343 myń otbasy bar. Olardyń 61%-y - tórt, 27%-y - bes, 9%-y - alty, qalǵan 3%-y - jeti jáne odan kóp bala tárbielep otyr.
Ministr málimdegendei, Soltústik Qazaqstan oblysynda kámeletke tolmaǵan 15 balasy bar otbasy ómir súredi. Olardyń kúnkórisine 7 balaǵa taǵaiyndalǵan memlekettik járdemaqy jetpeidi.
Esterińizge salaiyq, qańtar aiynan bastap kámeletke tolmaǵan tórt jáne odan da kóp balalary, onyń ishinde 23 jasqa deiin stýdent balalary bar otbasylarǵa tólenetin memlekettik járdemaqy kólemi 4 balaǵa – 42 496 teńge, 5 balaǵa – 53 127 teńge, 6 balaǵa – 63 757 teńge, 7 jáne odan kóp balaǵa – 74 388 teńge bolyp bekitildi.
Birjan Nurymbetov 1-3 balasy bar otbasylarǵa memlekettik járdemaqy tóleý máselesi talqylanǵanyn, biraq sheshilmegenin aitty.
"Qazir 370 myń kópbalaly otbasyǵa memlekettik járdemaqy berilip jatyr. Onyń 125 myń az qamtylǵan otbasy. Ministrlikke bir, eki, úsh balasy bar otbasylar habarlasyp, dál sondai kómek talap etýde. Biz túrli tásilderdi taldaý barysynda bul qadam biýdjetke aýyr salmaq salatynyn anyqtadyq", – dedi ol.
Ministrdiń dereginshe, elimizde bir, eki jáne úsh balaly 2 mln 904 otbasy bar.
"Bir, eki jáne úsh balasy bar otbasylarǵa memlekettik járdemaqy taǵaiyndaý máselesin sheshý qiyn bolyp tur. Olardyń arasynda áleýmettik jaǵdaiy jaqsy adamdar da joq emes.
Mundai adamdarǵa memlekettik járdemaqy qajet pe? Bul da úlken suraq.
Sondyqtan bul máselede eshqandai sheshimge kelgen joqpyz", – dedi Birjan Nurymbetov.
