Aitalyq, Úrjar aýdandyq máslihatynyń depýtaty, kásipker Muhamethan Aqpekovtyń muryndyq bolýymen jáne aýdandaǵy kásipker azamattardyń qoldaýymen «Úrjarǵa kómek» atty qaiyrymdylyq qory qurylyp, jinalǵan 20 mln teńge qarajatqa meditsinalyq qural-jabdyqtary men dári-dármekter satyp alynyp, aýdandaǵy aýrýhanalarǵa taratyldy.
Sonymen qatar aýdannan shyqqan metsenat, «Atamura» korporatsiiasynyń prezidenti Rahymǵali Abraruly Qul-Muhammed Maqanshy aýdanaralyq aýrýhanasyna jalpy quny 10 mln teńge turatyn ottegi kontsentrattaryn, qorǵanysh quraldaryn syiǵa tartyp, 1 mln teńge qarajatty «Úrjarǵa kómek» qoryna aýdardy.
Igi bastamaǵa aýdannan shyqqan sportshylar da úlesterin qosýda. Atap aitsaq palýan Áset Mámbetov týǵan jeri Altynshoqy aýylynyń turǵyndaryna dári-dármek alyp berdi.
Kóldeneń aýylyndaǵy «Iýbileinyi» JShS seriktestigi Úrjar aýylynda ornalasqan aýdanaralyq aýrýhananyń provizorlyq bóliminde em qabyldap jatqan azamattardyń densaýlyǵyn kóterý maqsatynda qomaqty mólsherde qymyz ben et ónimderi tabys etildi.
«Jumyla kótergen júk jeńil» degen naqyldy tý etken aýdan azamattary búgingi kúnge deiin 12 aýyldyq okrýgte, atap aitsaq, Úrjar, Maqanshy, Altynshoqy, Eltai, Joǵarǵy Eginsý, Kókózek, Qaraqol, Taskesken, Baqty, Qabanbai, Qaratuma aýyldarynda ornalasqan meditsinalyq mekemelerge jalpy somasy 40 mln teńgege jýyq qarajattyń meditsinalyq qural-jabdyqtary men dári-dármekterin tabys etti.
