Prokýror Abaı oblysyndaǵy Úrjar aýdanyna qarasty Besterek aýylynda balalardy qaǵyp ketken júrgizýshini 9,5 jylǵa sottaýdy surady, dep habarlaıdy Dalanews.kz.

Kezekti sot otyrysynda memlekettik aıyptaýshy aıyptalýshyǵa 9 jyl 6 aı merzimge bas bostandyǵynan aıyrý jazasyn taǵaıyndaýdy surady.

Buǵan deıin prokýror sotta jańartylǵan aıyptaý aktisin usynǵan. Onda aıyptalýshynyń kinásin tolyq moıyndaýy jeńildetetin mán-jaı retinde kórsetilgen. Al qylmystyń kámeletke tolmaǵandarǵa qatysty jasalýy jaýapkershilikti aýyrlatatyn jaǵdaı retinde baǵalanǵan.

Eske sala ketsek, 19 tamyzda Abaı oblysynyń Úrjar aýdanynda 55 jastaǵy júrgizýshi úıdiń qaqpasy mańynda oınap júrgen alty balany kólikpen qaǵyp ketken edi. Sol sátte úsheýi - eki, bes jáne segiz jastaǵy balalar oqıǵa ornynda qaza tapty. Sondaı-aq 6-9 jas aralyǵyndaǵy taǵy úsh bala jaraqat aldy.

Kólik júrgizýshisi eki aıǵa qamaýǵa alyndy. Onyń týystarynyń aıtýynsha, apatqa júrek talmasy sebep bolǵan.

Aıta keteıik, buǵan deıin Astana qalalyq Densaýlyq saqtaý basqarmasynyń baspasóz qyzmeti zardap shekken eki bala aýrýhanadan shyqqany týraly málimdegen edi.