Abaı oblysynyń burynǵy ákimi Nurlan Uranhaev jańa qyzmetke taǵaıyndaldy, – dep habarlaıdy Dalanews.kz.
Ol premer-mınıstrdiń keńesshisi bolyp taǵaıyndaldy. Nurlan Uranhaev ónerkásip jáne qurylys máselelerine jetekshilik etedi.
Nurlan Uranhaev Qazaq polıtehnıkalyq ınstıtýtynda (ınjener-mehanık) bilim alǵan. Sondaı-aq, Qazaq qarjy-ekonomıkalyq ınstıtýtyn (ekonomıs-menedjer) jáne Shyǵys Qazaqstan memlekettik tehnıkalyq ýnıversıtetin (ınjener-qurylysshy) támamdaǵan.
Eńbek jolyn 1987 jyly "Kazpromtehmontaj" tresinde slesar bolyp bastaǵan. 1990 jyly "Zerger" ónerkásiptik-qarjylyq korporasıasyn basqarǵan, keıin "Aqqus" AQ-nyń basshysy, "Sary-Arqa" AQ-nyń senimdi basqarýshysy, "Suńqar" JSHS prezıdenti bolǵan.
2003 jyly SHQO-nyń energetıka, turǵyn úı-kommýnaldyq sharýashylyq jáne kólik basqarmasynyń basshysy bolyp taǵaıyndalǵan. Keıin qurylys basqarmasyn basqarǵan. 2006–2007 jyldary SHQO ákiminiń orynbasary qyzmetin atqarǵan.
2010–2013 jyldary Qyzylorda oblysy ákiminiń orynbasary, keıin QR Tutynýshylar quqyqtaryn qorǵaý agenttigi tóraǵasynyń orynbasary qyzmetin atqarǵan.
2015 jyly "QazQSǴZI" AQ-ny basqarǵan. 2017 jyly Almaty qalasynyń sáýlet jáne qala qurylysy basqarmasynyń basshysy, 2019 jyly Astanada da osy qyzmetke kelgen.
2022 jylǵy 11 maýsymda Abaı oblysynyń ákimi bolyp taǵaıyndaldy. 2025 jylǵy 14 aqpanda bul qyzmetten bosatyldy. Onyń ornyna Prezıdenttiń burynǵy keńesshisi ári baspasóz hatshysy Berik Ýálı oblys ákimi bolyp taǵaıyndaldy.
