Qazaqstan Respýblikasynyń Atom energiiasy agenttigi ýran óndirýge arnalǵan tiptik kelisimshartty bekitý týraly buiryq jobasyn "Ashyq NQA" portalynda jariialap, ony 2026 jylǵy 6 naýryzǵa deiin qoǵamdyq talqylaýǵa usyndy, dep habarlaidy Dalanews.kz.
FBRK telegram arnasynyń málimetinshe, joba strategiialyq mańyzy bar ýran salasyndaǵy kelisimshart talaptaryn birizdendirýge jáne jańa kelisimder úshin mindetti normalardy bekitýge baǵyttalǵan. Qujat jer qoinaýyn paidalanýshynyń quqyqtyq mártebesin, kelisim merzimin jáne ken oryndarynyń shekarasyn retteidi.
Eń mańyzdy jańalyq - mindetti aýdarymdardyń engizilýi. Usynys boiynsha, óndirý shyǵyndarynyń 1%-y qazaqstandyq kadrlardy daiarlaýǵa, 1%-y ǵylymi-zertteý jáne tsifrlandyrýǵa, taǵy 1%-y óndiris júretin óńirdiń áleýmettik-ekonomikalyq damýyna baǵyttalýy tiis. Bul talaptardy barlyq jańa kelisimsharttar úshin mindetti etý kózdelip otyr.
Sonymen qatar qujatta jergilikti qamtýdy kúsheitý normalary qarastyrylǵan. Iaǵni kompaniialar qazaqstandyq mamandardy kóbirek tartýǵa jáne otandyq taýarlar men qyzmetterdi basym paidalanýǵa mindettelýi múmkin.
Joba ekologiialyq jáne radiatsiialyq qaýipsizdik talaptaryn da naqtylaidy. Onda jumystar aiaqtalǵan soń ken oryndaryn konservatsiialaý jáne óndirý saldaryn joiý mindeti kompaniialardyń esebinen oryndalýy tiis ekeni kórsetilgen.
Budan bólek, kelisimshart talaptary buzylǵan jaǵdaida materialdyq jaýapkershilik kúsheitiledi. Aiyppuldar AEK-pen nemese oryndalmaǵan mindetteme somasynyń paiyzymen eseptelmek. Al júieli buzýshylyqtar anyqtalsa, kelisimshartty buzý tetigi qarastyrylǵan.
Qujat qazir onlain talqylaýda. Sarapshylar men biznes ókilderi óz usynystaryn 6 naýryzǵa deiin joldai alady.
