Prokýror Aijan Aimaǵanova áleýmettik jelidegi paraqshasynda áielderdi kemsitýge jáne erler men áielderdi bir-birine qarsy qoiýǵa baǵyttalǵan pikirlerge qatysty jazba jariialady, dep habarlaidy dalanews.kz.
Ol sońǵy kúnderi áleýmettik jelilerde qyzý talqylanyp jatqan mundai kózqarastarǵa beijai qarai almaitynyn jetkizdi.
"Únsiz qala almaimyn. Sońǵy kúnderi áleýmettik jelilerde áielderdi kemsitýge, erler men áielderdi bir-birine qarsy qoiýǵa úndeitin pikirler qyzý talqylanyp jatyr. Bul meni beijai qaldyrmady.
Qazaqstan – demokratiialyq, zaiyrly ári quqyqtyq memleket. Ar-ojdan jáne dini senim bostandyǵy – ár adamnyń negizgi quqyqtarynyń biri.
Áiel – tek ana, qyz nemese ápke-qaryndas qana emes. Ol – dáriger, ustaz, ǵalym, kásipker, áskeri qyzmetshi, memlekettik qyzmetshi. Ol bala tárbieleidi, otbasynyń berekesin qalyptastyrady, ekonomikanyń damýyna úles qosady, memleketke qyzmet etedi jáne er azamattarmen birge elimizdiń bolashaǵyna ortaq jaýapkershilik arqalaidy. Sondyqtan áielge degen qurmet – belgili bir kózqarastyń nemese dástúrdiń máselesi emes. Bul – adamǵa degen qurmettiń kórinisi. Al adamǵa qurmet kórsetý – Konstitýtsiiamyzdyń negizgi qaǵidattarynyń biri", – dep jazdy Aijan Aimaǵanova.
