Prezident Qasym-Jomart Toqaev Respýblika kúnine arnalǵan saltanatty jiynda eldiń áleýmettik-ekonomikalyq damý qorytyndylaryna toqtaldy. Memleket basshysynyń aitýynsha, 2019 jyldan beri Qazaqstan ekonomikasy shamamen 30 paiyz ósken, dep habarlaidy dalanews.kz.
"Jan basyna shaqqandaǵy jalpy ishki ónim 15 myń dollardan asty. «Ulttyq qor – balalarǵa» baǵdarlamasy aiasynda 7 million balanyń esepshotyna 2,5 milliard dollar aýdaryldy. Byltyr 20 million sharshy metrden astam turǵyn úi paidalanýǵa berildi. Bul – buryn-sońdy bolmaǵan kórsetkish", – dedi Prezident.
Qasym-Jomart Toqaev qazaqstandyqtardyń ortasha ómir súrý uzaqtyǵy 76 jasqa jýyqtaǵanyn da atap ótti. Dúniejúzilik banktiń deregine súiensek, Qazaqstan bul kórsetkish boiynsha aimaqta aldyńǵy orynda tur.
Prezidenttiń sózinshe, eldiń jalpy ishki ónimi 350 milliard dollarǵa jaqyndaǵan. Osylaisha Qazaqstan TMD memleketteri arasynda ekinshi orynǵa shyqty jáne álemdegi iri ekonomikalar tiziminde 34-orynda tur.
"Shaǵyn jáne orta biznestiń jalpy ishki ónimdegi úlesi 40 paiyzǵa jetti. Kásipkerler otandyq taýar óndirisin ulǵaityp, jańa iskerlik mádeniet qalyptastyryp keledi. Qazir bul salada eńbekke jaramdy azamattardyń jartysyna jýyǵy jumys isteidi", – dedi Memleket basshysy.
