Áskerde júrip, bas-mı jaraqatyn alǵan sarbaz Erbaıan Muhtar 6 aıdan beri komada jatyr. QR İİM Ulttyq ulanynyń baspasóz qyzmeti sarbazdyń densaýlyǵyna qatysty resmı málimdeme jasady, dep habarlaıdy Dalanews.kz.
Ulttyq ulannyń habarlaýynsha, qatardaǵy Erbaıan Muhtardyń bas jaraqatyn alý faktisi boıynsha QR QK 440-baby 4-tarmaǵynyń 3-bóligine saı qylmystyq is qozǵalǵan. Bul jerde áskerı qyzmetshiler arasyndaǵy ózara qarym-qatynastardyń jarǵylyq erejelerin buza otyryp, densaýlyqqa aýyr zıan keltirgeni másele bolyp otyr.
"Qazirgi ýaqytta barlyq qajetti saraptamalar taǵaıyndaldy. Sotqa deıingi tergeý jalǵasyp jatyr. Tergeý barysy QR İİM ÁTD basshylyǵynyń baqylaýynda. Qatardaǵy jaýynger E.Muhtardyń ata-anasynyń talaby boıynsha ońaltý em-sharalary aıaqtalǵannan keıin úıine shyǵarylǵanyn habarlaımyz. Sonymen qatar, Densaýlyq saqtaý mınıstrliginiń emdeý mekemesi QR İİM Ulttyq ulanynyń áskerı-medısınalyq basqarmasymen birlesip oǵan múgedektikti resimdeý boıynsha kómek kórsetedi", - delingen resmı habarlamada.
Budan bólek, QR İİM Ulttyq ulanynyń Bas qolbasshylyǵy Reseı Federasıasynyń V. M. Behtereva atyndaǵy psıhıatrıa jáne nevrologıa Ulttyq medısınalyq zertteý ortalyǵyna, S. M. Kırov atyndaǵy Áskerı-medısınalyq Akademıasyna jáne Profesor A. L. Polenov atyndaǵy Reseı ǵylymı-zertteý neırohırýrgıalyq ınstıtýtyna, sondaı-aq konsýltasıalyq kómek berý jáne aýrýhanaǵa jatqyzý máselesin qarastyrý úshin Túrkıa elshiligine hat joldaǵany belgili boldy.
