Búgin qazaq sportynyń tarihyndaǵy erekshe kún. Búgin QR Týrizm jáne sport ministri Erbol Myrzabosynov óziniń Instagram paraqshasynda elimizdiń quralaidy kózge atqan mergenderi úlken jeńiske jetkenin jariia etti.
– Sadaq atýdan álem chempionatynda tarihi júlde jeńip alǵan Qazaqstan ulttyq quramasynyń sportshylary men jattyqtyrýshylar quramyn shyn júrekten quttyqtaimyn!
Adelia Jeksenbinova, Viktoriia Lian jáne Roksana Iýnýsova syndy sportshylarymyz jahandyq dodada ózderiniń sheberlikteri men jeńiske degen jigerin kórsetip, 32 jyldan keiin atalǵan sport túrinen el qorjynyna júlde saldy.
Ózderińizge málim, Memleket basshysynyń tapsyrmasymen elimizde sport salasyn jańǵyrtý jumystary keń aýqymda júrgizilip jatyr. Bul – salanyń tiimdiligin arttyrýǵa jáne jańa chempiondardy tárbieleýge baǵyttalǵan mańyzdy bastama. Búginde otandyq sport jańa qarqynmen damyp keledi.
Bul jeńiske sadaq atý federatsiiasynyń prezidenti Azamat Úsimbekov pen Bas hatshy Eset Baitasovtyń qosqan úlesin atap ótken jón. Olardyń basshylyǵymen Qazaqstanda sadaq atýmen 7 myńnan astam sportshy ainalysady, bul sport túri elimizdiń 15 óńirinde belsendi damyp keledi.
Atalǵan jetistik Qazaqstanda sadaq atý sportynyń berik irgetasy bar ekenin jáne halyqaralyq arenada jańa jeńisterge jetýge zor áleýeti bar ekenin aiqyn kórsetedi, – dep ministr aqjoltai jańalyqpen bólisti.
