Búgin Býrabaida Ulttyq quryltaidyń IV otyrysy bastaldy. Májilis depýtaty Marat Bashimov quryltaidyń birinshi kúnin qorytyndylap, pikir bildirdi, dep habarlaidy Dalanews.kz.
"Ulttyq quryltai sektsiialarynda ózekti máseleler kóterildi. Prezidenttiń ishki saiasat jáne kommýnikatsiialar máseleleri jónindegi kómekshisi Arman Qyryqbaevtyń ókildik etýmen ótken "Azamattyq qoǵam" sektsiiasynda azamattyq qoǵam institýttarynyń memlekettik organdarmen qarym-qatynasy, osy baǵytta qandai ózekti problemalar bar, solardy sheshý joldary syndy mańyzdy máseleler talqylandy. Olardyń kólemi jetkilikti jáne bári bul rette máselelerdi syni turǵyda qarastyryp, óz oilaryn yqshamdap jetkizýge tyrysty", - deidi ol.
Sondai-aq ol osy taqyrypta óziniń sóz sóilegenin de jetkizdi.
"Men de sóz aldym, sóitip Májiliste qoǵamǵa qajetti zańdar qabyldanyp jatqanyn basa atap óttim. Zań jobasynyń jumysyna degen kózqaras túbegeili ózgergen, oǵan burynǵydan qaraǵanda áldeqaida jaýappen qaraityn bolǵan. Plenarlyq otyrystar tikelei efirde kórsetilip, halyq ondaǵy jumystyń qalai júrip-turyp jatqandaryn óz kózderimen kórip, qadaǵalai alatyn boldy", – degen Marat Bashimov Parlament qabyldaǵan zańdardyń iske asyrý máselesine de basa nazar aýdardy.
Sonyń ishinde adam saýdasyna qarsy is-qimyl týraly zań qabyldanǵanyn, endi jergilikti bilik osy zańnyń iske asýyna belsendi túrde at salysýy tiistigin zańger nyǵyrlai jetkizedi.
"Qazir eńbek quldyǵyna, jynystyq jáne balalardy qanaýshylarǵa, qaiyr suraýshylarǵa, organ saýdasymen ainalysatyndarǵa jáne taǵy basqalaryna kimder "kryshavat" etetinin barsha jaqsy bilip-baiqap otyr", - degen ol sóz sońynda osy rettegi mańyzdy zańnyń qajettiligin Ulttyq qoǵamdyq senim keńesiniń tórtinshi otyrysynda Qasym-Jomart Toqaev 2020 jyly 22 qazanda, iaǵni 4,5 jyl buryn atap ótkenin eske saldy.
Negizinen, Ulttyq quryltaidyń 2022 jylǵy otyrysy Ulytaýda, 2023 jylǵysy Túrkistanda, 2024 jylǵysy Atyraýda ótken bolatyn.
Buǵan deiin Qazaqstan Prezidenti 14 naýryzda Býrabaida ótetin Ulttyq quryltaidyń IV otyrysyna qatysatynyn habarlaǵan bolatynbyz.
