Búgin Astanada Ulttyq quryltai jumys sektsiialarynyń otyrystary ótti.
Shara bastalar aldynda Ulttyq quryltai tóraǵasynyń orynbasary – Memlekettik keńesshi Erlan Qarin quryltai jumysynyń negizgi baǵyttary jóninde Prezidenttiń qańtar aiynda «Egemen Qazaqstan» gazetine bergen suhbatynda aitylǵanyn atap ótti. Sondai-aq osy konsýltativtik-keńesshi organnyń qyzmeti aiasynda Memleket basshysy kótergen bastamalardyń júzege asyrylý barysyna qysqasha toqtaldy.
Atap aitqanda, Memlekettik keńesshi Prezidenttiń Shyǵys Qazaqstan oblysy men Abai oblysynda jańa aýdandardy qalpyna keltirýge jáne qurýǵa, óńirlik rámizderdi retteýge, sondai-aq «Áziret Sultan» tarihi-mádeni qoryq-mýzeiine «Ulttyq» mártebe berýge, «Balalar kitaphanasy» jobasyna qatysty bastamalary júzege asyrylǵanyn erekshe atap ótti.
Erlan Qarin zań men tártip qaǵidattaryn bekitý jáne ilgeriletý jumystarynyń qoǵamdyq mańyzy zor ekenine nazar aýdardy. Atap aitqanda, turmystyq zorlyq-zombylyqqa qarsy kúres, balalar men áielderdiń quqyqtaryn qorǵaý, Nashaqorlyqqa jáne esirtki biznesine qarsy kúrestiń 2023-2025 jyldarǵa arnalǵan keshendi josparyn bekitý týraly zań jobasyn ázirleý, Parlament Májilisiniń veipterdi elimizge ákelýge, óndirýge, satýǵa jáne taratýǵa tyiym salý týraly zań jobasyn qabyldaýy osy baǵyttaǵy aýqymdy jumystardyń aiasyna kiredi.
Shara sheńberinde bir mezgilde «Azamattyq qoǵam», «Mádeniet. Óner. Rýhaniiat», «Bilim jáne ǵylym», sondai-aq «Áleýmettik-ekonomikalyq damý» sektsiialarynyń jumys otyrystary ótti.
Sektsiialardyń jumysy barysynda memlekettik organdar Ulttyq quryltai músheleriniń buǵan deiin aitqan usynystaryna orai pikir bildirdi. Sondai-aq qoǵamnyń birligin nyǵaitýǵa, qoǵamdyq tártip pen zańdylyqtyń saqtalýyna, ulttyq qundylyqtardy nasihattaýǵa baǵyttalǵan jańa usynystar talqylandy.
Ulttyq quryltai hatshylyǵy jiyn barysynda kóterilgen bastamalady jinaqtap, muqiiat zerdeleidi.
Qazirgi tańda kóktemde ótetin Ulttyq quryltaidyń úshinshi otyrysyna daiyndyq jumystary júrip jatyr.
