Shot operatory retinde "Biryńǵaı jınaqtaýshy zeınetaqy qory" tańdalǵan.
Ekonomıka mınıstri Álibek Qýantyrovtyń málim etkeninde Ulttyq qordan balalardyń shotyna aqsha aýdarý ádistemesi daıyn, óz kezeginde Qarjy mınıstrligi onyń erejelerin ázirleý ústinde.
"Esepte turǵan 18 jasqa deıingi balalarǵa jyldyq qorytyndy boıynsha tıisti ınvestkiristiń 50 paıyzy túsedi.
Osy 50 paıyz ár balaǵa úlestiriledi. Jalpy 6,5 mln bala 18 -ge tolǵansha osy júıede bolady.
Tek bir jyldyń kirisin ǵana qaramaımyz. Biz 18 jyldaǵy ortasha kiristi alamyz. Sebebi, 18 jyldyń ishindegi ár kezeńde kiris oń bolýy kerek», - dedi ol.
Alaıda bala 18-ge tolǵan soń azamattyǵyn aýystyrsa, ol bul aqshany ala almaıdy.
"Bul aqsha basqa balalarǵa, jalpy Ulttyq qordyń ishinde úlestiriledi. Ulttyq qordaǵy shotynan aqshany sheship alǵanda oǵan salyq salynbaıdy", - dedi Álibek Qýantyrov.
Qýantyrov munyń aldynda "bala 18 jasqa tolǵansha shotyndaǵy aqsha qunsyzdanyp ketpeı me?" degen saýalǵa jaýap bergen.
"Qarajat qunsyzdanbaıdy, sebebi ol dollarmen aýdarylady. Ulttyq qordaǵy qarajat 100% dollarmen saqtalady. Óıtkeni, qordyń búkil aktıvteri shetelde, ıaǵnı shetelge ınvestısıalanǵan. Ol da bizge yńǵaıly. Sol úshin solaı shottarǵa jberiletin bolady", – dep túsindirgen edi mınıstr.
Buǵan deıin Prezıdent Toqaev Ulttyq qordyń jyldyq ınvestısıalyq kirisiniń 50 paıyzyn balalardyń shotyna aýdaratynyn málimdegen. Jınaq shotyndaǵy aqshany olar kámeletke, ıaǵnı 18-ge tolǵanda ǵana ala alady.
"Árbir otbasy eldiń ulttyq baılyǵyn paıdalanǵany úshin naqty tabys alýy kerek. Sondyqtan men jarıalaǵan Balalar jyly aıasynda jańa "Balalarǵa arnalǵan ulttyq qor" baǵdarlamasyn iske qosýdy asa mańyzdy dep sanaımyn.
Kámelettik jasqa tolǵannan keıin olar jınaqtalǵan somany turǵyn úı satyp alýǵa jáne bilim alýǵa jumsaı alady.
Bul qarajat óskeleń urpaqqa kámelettik jasqa shyn joldama beredi. Qor shynymen de ulttyq mártebege ıe bolyp, halyq ıgiligine qyzmet etetin bolady. Osy aýqymdy isti jan-jaqty zerdeleý qajettiligin eskere otyryp, jobany 2024 jyldyń 1 qańtarynan bastap iske qosýdy tapsyramyn", — degen bolatyn Prezıdent.
Bul rette Prezıdenttiń baspasóz hatshysy Rýslan Jeldibaı da Facebook-te arnaıy jazba qaldyrǵan.
«Prezıdenttiń bastamasymen Balalar jylynyń aıasynda «Ulttyq qor – balalarǵa» atty jańa baǵdarlama iske qosylady. Úkimet pen Ulttyq banktiń esebi boıynsha elimizde jyl saıyn 400 myń sábı dúnıege keledi.
Ár bala 18 jasqa tolǵansha olardyń esepshotynda kemi 3 myń AQSH dollaryna teń qarajat jınalady», delingen onyń jazbasynda.
