Tek Almatyda, olardyń aitýynsha, qazir 308 adam qamaýda otyr. Olardyń barlyǵy tártipsizdikterge qatysqany úshin ustalǵan. Biraq bári de óz kinásin moiyndamaidy, dep habarlaidy Dalanews.kz "KTK" arnasyna silteme jasap.
Komissiia músheleri qańtar oqiǵasyna qatysty qozǵalǵan qylmystyq isterdiń barlyǵynyń tergeýine qatysqysy keledi. Meiirgúldiń týǵan baýyryn izdep júrgenine bir aidan asty. Sherýge shyqqan Maqsatty 6-qańtarda politsiia ustap, bir aptadan keiin bosata salǵan. Sol shyqqannan 31 jastaǵy jigit habar-osharsyz ketipti. Jaqyndary onyń óli, ne tiri ekenin bilmeidi.
"Baýyrymyzdyń bar-joǵyn bilýim kerek qoi. Jańaózennen izdep kelip otyrmyn. Óli, ne tiri ekenin bilmeimiz. Bir ai, on kún ótti. Politsiia 12-si shyǵaryp jiberdik degen. Sodan beri máiithanaǵa da bardym. Barmaǵan jerimiz, baspaǵan taýymyz joq. "Altyn ordada" jumys istegen. Tachka súireitin", - deidi Meiirgúl Qanatbaeva.
Meiirgúl syndy jappai táripsizdikterden keiin joǵalǵan hám jazyqsyz qamalǵandardyń quqyǵyn qorǵaýǵa "Aqiqat" qoǵamdyq komissiiasy kirisken edi.
Zańgerlerden quralǵan komissiia músheleri qańtar oqiǵasynyń sebebin de anyqtap kórmek. Aiman Omarova bastaǵan top dúrbeleńnen keiin qozǵalǵan qylmystyq isterden Ulttyq qaýipsizdik komitetiniń qyzmetkerlerin túgel shettetý kerek dep prezidentke úndeý joldady. Óitkeni basshylary "memleketke opasyzdyq jasady" dep kúdikke ilingen komitetke sený qiyn deidi olar.
Komissiia ókilderiniń málimetinshe, qamalǵandardyń arasynda Qytai, Saýd Arabiiasy, Ózbekstan azamattary da bar. Biraq qaraly qańtarǵa qatysqan sheteldikterdiń naqty sany ázirge belgisiz.
"Zerttegen kezde keibireýi óz ultyn "qazaq" dep jazǵanymen, ulty basqa siiaqty. "Ultyń kim?" dep suraǵanda, "qazaq" dep aita salǵandai. Men politsiiaǵa ata-anasynyń ultyna qaraý keregin aittym. Al óńirler boiynsha kóbinese Túrkistan men Almaty oblysynyń turǵyndary. Basqa oblystardan da bar, biraq olardyń úlesi az", - deidi "Aqiqat" qoǵamdyq komissiiasynyń jetekshisi Aiman Omarova.
Qoǵamdyq komissiianyń qatysýymen birneshe qalanyń tergeý abaqtysynda jatqan 45 kúdikti úiqamaqqa jiberilgen. Advokattar "týysymyzdy izoliatorda azaptady" degen shaǵymdardy da qarap, azamattarǵa quqyqtyq keńes bermek. Jalpy osy komissiiasynyń negizgi mindeti — qańtar qasireti arnaiy uiymdastyrylǵan ba, oǵan kim kináli degen túrli suraqtarǵa da jaýap izdeý. Komissiia músheleri qazir shetel zańgerlerimen de kelissóz júrgizilip jatqanyn jetkizdi.
