Aldaǵy 10-15 jylda ulttyq bolmystan aiyrylyp qalý qaýpi bar. Bul týraly saiasatker Dos Kóshim aitty, - dep habarlaidy Dalanews.kz.
Dos Kóshimniń sózinshe, ulttyq bolmysynan aiyrylyp qalǵan elder de bolǵan.
«Qazaqtarǵa da osy keledi. Batys Qazaqstan oblysynda meniń qaiyn jurtym turady, baldyzymnyń aty Svet, Svetlana dep jazylǵan. Ol aýylda Katia bar, Sasha bar. Eger táýelsizdigimizdi 20 jyldan keiin alǵan bolsaq, aýyldarda 80 paiyz oryssha ataýlar kiredi. Qazaqsha mektepter jabylyp jatqanyn da bilemiz. Bul másele ári qarai jylji berse, ult joǵalyp ketetin jaǵdaiǵa jetemiz.
Táýelsizdik alǵannan keiin osynyń bárin qalypqa keltirýdiń ornyna, orystyq deńgeidi ustap qaldyq, endi oǵan batystyq mádeniet kele bastady. Jańa jyldy toilaýdy bylai qoiǵanda keibir mektepter asqabaq kúnin toilaýdy bastady. Frantsýzdardan kelgen Áýlie Valentin kúni bir-birine hat jazyp, mahabbatty aityp, ol kirip kele jatyr. Sondyqtan ulttyń joǵalyp ketý qaýpi áli de bar. Bizdi saqtap otyrǵan bir nárse – demografiia», - deidi Dos Kóshim BAIMEDIA iýtýb arnasyna bergen suhbatynda.
Saiasatkerdiń sózinshe, ekinshi kemshilik – ultty alǵa bastaityn, ulttyq máseleni jalaý etip júretin ziialy qaýym.
«Maǵan renjimesin, biz 1990-jyldary olardy kórmedik. Olar bilik ne aitsa, soǵan jyǵylatynǵa ainalyp ketti. Bilik ultshyldyq baǵyttaǵy adamdardy atyp, sottap jeńe almaitynyn túsindi. Sóitip olarǵa ekinshi tásildi qoldandy: olarǵa jazýshylar odaǵyn jasap berdi, shyǵarmashylyq úiin salyp berdi, kitaptaryn 100 myń tirajben shyǵaratyn boldy.
Sodan keiin óleńder shyǵa bastady. Qysqasy totalitarlyq bilik ulttyń ziialy qaýymynyń bárin qai jaqta jel soqsa, soǵan japyrylatyn qaýymǵa ainaldyryp jiberdi», - deidi Dos Kóshim.
