الداعى 10-15 جىلدا ۇلتتىق بولمىستان ايىرىلىپ قالۋ ءقاۋپى بار. بۇل تۋرالى ساياساتكەر دوس كوشىم ايتتى، - دەپ حابارلايدى Dalanews.kz.
دوس كوشىمنىڭ سوزىنشە، ۇلتتىق بولمىسىنان ايىرىلىپ قالعان ەلدەر دە بولعان.
«قازاقتارعا دا وسى كەلەدى. باتىس قازاقستان وبلىسىندا مەنىڭ قايىن جۇرتىم تۇرادى، بالدىزىمنىڭ اتى سۆەت، سۆەتلانا دەپ جازىلعان. ول اۋىلدا كاتيا بار، ساشا بار. ەگەر تاۋەلسىزدىگىمىزدى 20 جىلدان كەيىن العان بولساق، اۋىلداردا 80 پايىز ورىسشا اتاۋلار كىرەدى. قازاقشا مەكتەپتەر جابىلىپ جاتقانىن دا بىلەمىز. بۇل ماسەلە ءارى قاراي جىلجي بەرسە، ۇلت جوعالىپ كەتەتىن جاعدايعا جەتەمىز.
تاۋەلسىزدىك العاننان كەيىن وسىنىڭ ءبارىن قالىپقا كەلتىرۋدىڭ ورنىنا، ورىستىق دەڭگەيدى ۇستاپ قالدىق، ەندى وعان باتىستىق مادەنيەت كەلە باستادى. جاڭا جىلدى تويلاۋدى بىلاي قويعاندا كەيبىر مەكتەپتەر اسقاباق كۇنىن تويلاۋدى باستادى. فرانسۋزداردان كەلگەن اۋليە ۆالەنتين كۇنى بىر-بىرىنە حات جازىپ، ماحابباتتى ايتىپ، ول كىرىپ كەلە جاتىر. سوندىقتان ۇلتتىڭ جوعالىپ كەتۋ ءقاۋپى ءالى دە بار. ءبىزدى ساقتاپ وتىرعان ءبىر نارسە – دەموگرافيا»، - دەيدى دوس كوشىم BAIMEDIA يۋتۋب ارناسىنا بەرگەن سۇحباتىندا.
ساياساتكەردىڭ سوزىنشە، ەكىنشى كەمشىلىك – ۇلتتى العا باستايتىن، ۇلتتىق ماسەلەنى جالاۋ ەتىپ جۇرەتىن زيالى قاۋىم.
«ماعان رەنجىمەسىن، ءبىز 1990-جىلدارى ولاردى كورمەدىك. ولار بيلىك نە ايتسا، سوعان جىعىلاتىنعا اينالىپ كەتتى. بيلىك ۇلتشىلدىق باعىتتاعى ادامداردى اتىپ، سوتتاپ جەڭە المايتىنىن ءتۇسىندى. ءسويتىپ ولارعا ەكىنشى ءتاسىلدى قولداندى: ولارعا جازۋشىلار وداعىن جاساپ بەردى، شىعارماشىلىق ءۇيىن سالىپ بەردى، كىتاپتارىن 100 مىڭ تيراجبەن شىعاراتىن بولدى.
سودان كەيىن ولەڭدەر شىعا باستادى. قىسقاسى توتاليتارلىق بيلىك ۇلتتىڭ زيالى قاۋىمىنىڭ ءبارىن قاي جاقتا جەل سوقسا، سوعان جاپىرىلاتىن قاۋىمعا اينالدىرىپ جىبەردى»، - دەيدى دوس كوشىم.
