Arnaiy memlekettik qordan zańsyz shyǵarylǵan jáne elge qaitarylǵan aktivter esebinen 880 mln teńge bólinip, bul qarajat Ulytaý oblysynda jeti meditsinalyq mekeme salýǵa baǵyttaldy, dep habarlaidy Dalanews.kz.
"Prezident Qasym-Jomart Toqaev Ulytaý oblysynyń áleýmettik-ekonomikalyq damýyna airyqsha mán beredi. Óńirde azamattardyń ómir sapasyn arttyrýǵa baǵyttalǵan áleýmettik jobalar júzege asyrylyp jatyr. Memleket basshysynyń tapsyrmasymen Arnaiy memlekettik qordan densaýlyq saqtaý nysandaryn salýǵa 880 mln teńge bólindi", – delingen habarlamada.
Bul qarajat "Aýyldyq densaýlyq saqtaýdy jańǵyrtý" ulttyq jobasy aiasynda Ulytaý jáne Jańaarqa aýdandarynda alǵashqy meditsinalyq-sanitarlyq kómek kórsetetin jeti nysannyń qurylysyna jumsalýda.
Sonyń ishinde eki jańa dárigerlik ambýlatoriia Aqtúbek jáne Kengir aýyldarynda ashylady. Al Betbulaq, Pioner, Qorǵasyn, Ainabulaq jáne Eginde aýyldarynda meditsinalyq pýnktter salynyp jatyr. Barlyq nysandy osy jyldyń sońyna deiin paidalanýǵa berý josparlanǵan.
Eske salaiyq, buǵan deiin Prezident tapsyrmasymen Qyzylorda oblysynda qaitarylǵan aktivter qarajaty esebinen 7 mlrd teńgege jańa meditsinalyq mekemeler salynǵan edi.
Memleket basshysynyń tapsyrmasyn júzege asyrý aiasynda Qazaqstanda zańsyz shetelge shyǵarylǵan aktivterdi elge qaitarý arqyly áleýmettik nysandar salý jumystary jalǵasyp jatyr. Arnaýly memlekettik qordan Qyzylorda oblysyndaǵy densaýlyq saqtaý salasyndaǵy birqatar jobaǵa shamamen 7 mlrd teńge bólindi.
Bul qarajat Aral, Qazaly, Shieli jáne Jańaqorǵan aýdandaryndaǵy ortalyq aýdandyq aýrýhanalar janynan jańa ǵimarattar salýǵa baǵyttalǵan.
Onda insýlt ortalyqtary, rentgenhirýrgiia bólimsheleri jáne basqa da beiindi bólimder ashylyp, zamanaýi meditsinalyq jabdyqtar: magnittik-rezonanstyq tomografiia, kompiýterlik tomografiia jáne angiografiialyq qondyrǵylar ornatylady.
Jobalar júzege asqan soń aýyldyq jerlerdegi 300 myńnan astam turǵyn mamandandyrylǵan meditsinalyq kómekke qol jetkizedi.
Nysandardy biyl paidalanýǵa berý josparlanǵan.
