Sot Ulytaý oblysynyń Mádeniet, tilderdi damytý jáne muraǵat isi basqarmasynyń basshysy Ánýar Omarǵa qatysty úkim shyǵardy, dep habarlaidy Dalanews.kz.
Úkim 12 naýryzda Jezqazǵan qalalyq sotynda jariialandy. Naqtyraq aitsaq, Ulytaý oblysynyń mádeniet, tilderdi damytý jáne muraǵat isi basqarmasynyń burynǵy basshysy O. men K.-ǵa Qazaqstan Respýblikasy Qylmystyq kodeksiniń 366-baby 3-bóliginiń 2-tarmaǵy "Aldyn ala sóz bailasý arqyly adamdar tobynyń para alýy" boiynsha aiyp taǵyldy.
Sotta O.-nyń bólim basshysy bolǵan kezde, oblys aýmaǵyndaǵy kóne qorymdardaǵy arheologiialyq qazbalar jónindegi jumystardy memlekettik satyp alý sharty boiynsha aktilerge qol qoiǵany jáne jalpy qamqorlyǵy úshin merdiger uiymnan 2 million teńge kóleminde para alǵany anyqtaldy.
"Aiyptalýshy K., laýazymdy tulǵa, memlekettik organnyń basshysy bola tura, "K" JShS ókilimen arheologiia salasyndaǵy ǵylymi-zertteý jáne tájiribelik-konstrýktorlyq jumystardy memlekettik satyp alý týraly shart jasasqan", - delingen Jezqazǵan qalalyq sotynyń baspasóz qyzmetiniń habarlamasynda.
Sottalýshylar aiyppul túrindegi jaza taǵaiyndaýdy surady. Al K. "qatty ókinetinin aityp" Qazaqstan Respýblikasy Qylmystyq kodeksiniń 65-babynyń negizinde qylmystyq jaýaptylyqtan bosatýdy ótindi.
Sottalýshylardyń kinási olardyń moiyndaýymen jáne sotqa usynylǵan dáleldemelerdiń jiyntyǵymen anyqtaldy. Úkimdi taǵaiyndaý kezinde qylmystyq jaýaptylyq pen jazany jeńildetetin mán-jailar – sottalýshylardyń óz kinásin moiyndaýy, jasaǵan is-áreketterine qatty ókinýi jáne jas balalarynyń bolýy eskerildi.
"Sot úkimimen osy memlekettik mekemelerdiń basshylaryna árqaisysyna 6 jyl bas bostandyǵynan aiyrý jazasy taǵaiyndaldy. "Mádeni murany zertteý jáne saqtaý ortalyǵy" JShS merdiger kompaniiasynyń ókiline 3,5 jylǵa bas bostandyǵynan aiyrý jazasy taǵaiyndaldy. Barlyq sottalǵandar ómir boiy memlekettik qyzmette qyzmet atqarý quqyǵynan aiyrylady", - delingen habarlamada.
Úkim zańdy kúshine engen joq.
Eske salaiyq, osy jyldyń aqpan aiynda QR Sybailas jemqorlyqqa qarsy is-qimyl agenttiginiń qyzmetkerleri Ulytaý oblystyq mádeniet, tilderdi damytý jáne muraǵat isi basqarmasynyń basshysy Ánýar Omardy ustaǵany belgili boldy. Kúdikti oblys aýmaǵyndaǵy ejelgi qorymdardaǵy arheologiialyq qazbalar jónindegi jumystardy memlekettik satyp alý sharty boiynsha aktilerge qol qoiǵany jáne jalpy qamqorlyǵy úshin merdiger uiymnan 2 million teńge kóleminde para alǵan.
