«Uly kósh» kútip tur
– Halyqty ońtústik óńirlerden soltústikke qonystandyrý elimizdegi mańyzdy másele. Zertteýlerge súiensek, osy qarqynmen kete beretin bolsaq, 2050 jyly ońtústik aimaqtarda búkil halyqtyń 55 paiyzy turatyn bolady. Taǵy bir zertteýge sáikes, 2030 jylǵa qarai soltústikte halyq sany 1 mln-ǵa azaiyp, ońtústik óńirlerde 5 mln-ǵa kóbeiedi degen boljam bar. Sondyqtan, biz halyqty turaqtandyrý máselesin qaraýymyz kerek. Biraq, ol azamattyń óziniń erkimen jasalatyn dúnie. Májbúrlep kóshirýge eshqandai zań quqyq bermeidi. Halyq múddeli bolý úshin yntalandyrý tetikteri jasalýy kerek. Muny biz «Jumyspen qamtý jol kartasynda» qarastyryp otyrmyz, – dedi B.Nurymbetov.
Vitse-ministrdiń aitýynsha, kóshi-qon eńbek resýrstarynyń birneshe túri bar. Birinshisi – oblys ishindegi eldi mekender arasynda qonys aýdarý. Ol ekonomikalyq áleýeti tómen eldi mekenderden kórkeigen jerlerge kóshýdi qarastyrady. Baǵdarlama 2011 jyldan bastap iske asyryldy. Sol kezden bastap 17,5 myń adam kóshirildi. Resmi statistika boiynsha, Qazaqstanda ekonomikalyq áleýeti tómen 409 eldi meken bar.
«Qonystanýdyń ekinshisi – oblysaralyq, iaǵni bir oblystan ekinshi oblysqa kóshý. Byltyrdan bastap óńirlik kvota engizildi. Úkimet eńbek resýrstary tapshy óńirlerdi belgileidi, sóitip eńbek resýrstary artyq óńirlerden kóshýge qoldaý jasaidy. Jumys kúshi tapshy aimaqtarǵa Soltústik Qazaqstan, Pavlodar, Shyǵys Qazaqstan men Qostanai oblystary jatady», – dedi vitse-ministr.
Onyń aitýynsha, eger azamattar óz erkimen ońtústik óńirlerden soltústikke kóshetin bolsa, qoldaý kórsetiledi. Qoldaý kóshi-qonǵa ketken shyǵyndardy óteidi. Otaǵasyna 50 AEK nemese 106 myń teńgeden bólinedi. Sonymen qatar ár otbasy múshesine 35 AEK, 74 myń teńgeden astam qarajat qarastyrylǵan. 5 adamnan turatyn otbasyǵa 402 myń teńgege kómek kórsetiledi. Olar bastapqyda jaldamaly úi nemese jataqhanamen jáne jumyspen qamtylady. Qajet bolsa, qaita daiarlaý, biliktiligin arttyrý kýrsynan ótedi. Al kásipkerlikpen ainalysam dese, 5 mln teńgege deiin shaǵyn nesie beriledi.
«Jumys kúshi mol aimaqtardan jumys kúshi tapshy aimaqtarǵa 320 otbasy kóshti (672 adam). 424 jumysqa jaramdy otbasy músheleriniń 319-y jumysqa ornalastyryldy, onyń ishinde turaqty jumys oryndaryna 314 adam ornalasty. Biylǵy jyly 109 otbasy Ońtústik Qazaqstannan Soltústik Qazaqstanǵa qonys aýdardy. Taǵy 200-den astam otbasy ońtústikten soltústikke kóshýge daiyn», - dedi vitse-ministr.
