Qostanai tuqymdy tulparlarmen óner kórsetken Allur kompaniiasynyń komandasy "Uly Dala joryǵy" atty ekinshi halyqaralyq marafon-báigede birinshi oryn ielendi, dep habarlaidy Dalanews.kz.
Shabandozdar 500 shaqyrymdyq qashyqtyqty 31 saǵat 19 minýtta eńserip, Qyrǵyz Respýblikasy, Vengriia, Iran, Resei jáne Ońtústik Afrika Respýblikasynan kelgen qatysýshylardy qosa alǵanda, 19 komandanyń ishinen úzdik nátije kórsetti. Márege nebári bes komanda ǵana jete aldy. Ekinshi oryndy Qyrǵyz Respýblikasy quramasy, úshinshi oryndy Ulytaý oblysynyń komandasy ielendi.
Komandanyń ereksheligi — barlyq tulparlardyń qostanai tuqymynan iriktelgeni. Qostanai jylqysy – Qazaqstannyń ulttyq genofondyna resmi túrde engen alǵashqy otandyq sporttyq baǵyttaǵy tuqymy. HH ǵasyrdyń ortasynda ósirilgen bul tuqym tózimdiligimen, fizikalyq qýatymen jáne elimizdiń qatal klimattyq jaǵdaiyna beiimdiligimen erekshelenedi.
Bul erekshe tuqymdy saqtaý men damytý tek ǵylymi qoldaýdy ǵana emes, sonymen qatar biznestiń belsendi qatysýyn qajet etedi. Qazaqstandyq Allur avtokólik kompaniiasy asyl tuqymdy jylqy sharýashylyǵyn júieli túrde qoldap keledi. Bul jumys salalyq ǵylymi institýttarmen jáne Qostanai oblysy ákimdiginiń qoldaýymen tyǵyz yntymaqtastyqta júzege asyrylýda. Óńirdiń genetikalyq qoryn saqtaý isinde ákimdik te mańyzdy ról atqaryp otyr.
"Búginde biz tek óndiristik qyzmetpen shektelmeitin ulttyq bastamalardy qoldai alatynymyzǵa maqtanamyz. Bizdiń tulparlardyń marafonǵa qatysýy – jai ǵana sporttyq jetistik emes, qostanai tuqymyn saqtaý men onyń ulttyq genetikalyq qor retindegi mańyzyn arttyrýǵa qosylǵan naqty úles. Bul jumysty biz korporativtik missiiamyzdyń bir bóligi retinde qarastyramyz – otandyq qundylyqtardy saqtap, damytý, elimizdiń turaqty bolashaǵyna úles qosý", – dedi Allur zaýytynyń bas direktory Syrym Semeibaev.
Kompaniia tarapynan kórsetiletin qoldaý tek marafondarǵa qatysýmen shektelmeidi: turaqty túrde jylqy ustap-kútý, jattyǵýlar uiymdastyrý, selektsiialyq jumystarǵa kómek kórsetý jáne qoǵam nazaryn tuqym máselelerine aýdarý da qolǵa alynǵan. Marafondaǵy jeńis – biznestiń tutas bir salanyń bolashaǵyna oń yqpal ete alatynynyń dáleli.
Mamandardyń aitýynsha, joǵary genetikalyq jáne mádeni qundylyǵyna qaramastan, qostanai tuqymynyń sany az, jeke sharýashylyqtardyń qyzyǵýshylyǵy tómendeýde, sonymen qatar tuqymǵa tán erekshe sipattar joiylyp ketý qaýpi bar. Mundai jaǵdaida jaýapty biznespen áriptestik — turaqtylyqtyń sheshýshi faktoryna ainalýda.
"Uly Dala joryǵyndaǵy" bul tulparlardyń jeńisi – sporttyq jetistik qana emes, sonymen qatar qazirgi zamanǵy biznestiń eldiń mádeni jáne biologiialyq murasyn saqtaýda mańyzdy ról atqara alatynyn kórsetedi.
