23 qyrkúiekte Qazaqstan Ýkrainamen birlesip, alaiaqtardyń transulttyq qylmystyq tobynyń jolyn kesti, dep habarlaidy Dalanews.kz.
Chernovtsy men Odessa qalalarynda uzaq merzimdi birlesken jedel is-sharalar nátijesinde Qazaqstan azamattaryn aldaýmen ainalysqan alaiaqtyq call ortalyq joiyldy.
"Qylmyskerler aldyn ala qurylǵan shema boiynsha áreket etken. Olar jábirlenýshilerge Qazaqstannyń Ulttyq banki, quqyq qorǵaý organdary men arnaiy qyzmetteri atynan qońyraý shalyp, "kúdikti operatsiialar" men "terroristik uiymdardy qarjylandyrý" úshin qylmystyq jaýapkershilikke tartamyz dep qorqytyp, azamattardy nesie alýǵa, múlkin satýǵa jáne depozittegi qarajatty droptardyń shotyna aýdarýǵa májbúrlegen. Osylaisha psihologiialyq qysym jasaǵan. Top naqty ierarhiiadan turǵan. Árkim óz rólin atqarǵan. Onda ákimshiler, HR-menedjerler, "kloýzerler", tehnikalyq qyzmetkerler, tipti "kúshtik blok" bolǵan.
Qylmystyq jolmen alynǵan aqsha call-ortalyqtyń jumysyna, kólik satyp alýǵa jáne taǵy da basqa nárselerge jumsaldy. "Keńseni" ustaý úshin uiymdastyrýshylar aiyna 60 myń AQSh dollaryn jaratqan, al kúdiktilerdiń biri sońǵy alty aida bes kólik satyp alǵan. Bir mezgilde kúdiktilerdiń turǵylyqty mekenjailary boiynsha jáne sall-ortalyqtyń ózinde júrgizilgen tintý barysynda 30-dan asa kompiýterlik tehnika, 79 uialy telefon, sim-kartalar, nysandy kiim-keshek, quqyq qorǵaý jáne arnaiy organdardyń, Ulttyq banktiń qyzmetkerleriniń jalǵan kýálikteri, azamattardy aldaýǵa arnalǵan túrli jaýap nusqalary bar aldyn ala daiyndalǵan stsenariiler, sondai-aq basqa da aiǵaqtar tárkilendi", - dedi QR IIM kiberqylmysqa qarsy is-qimyl departamenti bastyǵynyń orynbasary Aslan Óskembaev.
Tárkilengen qurylǵylarda deepfake tehnologiiasy arqyly beine men daýysty ózgertýge arnalǵan arnaiy baǵdarlamalyq jasaqtama tabylǵan. Aldyn ala málimet boiynsha qaskúnemder Qazaqstan turǵyndaryn 900 million teńgeden asa somaǵa aldaǵan. Arnaiy operatsiia nátijesinde Ýkrainanyń toǵyz azamaty ustalyp, onyń beseýi qamaýǵa alyndy.
