23 قىركۇيەكتە قازاقستان ۋكراينامەن بىرلەسىپ، الاياقتاردىڭ ترانسۇلتتىق قىلمىستىق توبىنىڭ جولىن كەستى، دەپ حابارلايدى Dalanews.kz.
چەرنوۆسى مەن ودەسسا قالالارىندا ۇزاق مەرزىمدى بىرلەسكەن جەدەل ءىس-شارالار ناتيجەسىندە قازاقستان ازاماتتارىن الداۋمەن اينالىسقان الاياقتىق call ورتالىق جويىلدى.
"قىلمىسكەرلەر الدىن الا قۇرىلعان سحەما بويىنشا ارەكەت ەتكەن. ولار جابىرلەنۋشىلەرگە قازاقستاننىڭ ۇلتتىق بانكى، قۇقىق قورعاۋ ورگاندارى مەن ارنايى قىزمەتتەرى اتىنان قوڭىراۋ شالىپ، "كۇدىكتى وپەراسيالار" مەن "تەرروريستىك ۇيىمداردى قارجىلاندىرۋ" ءۇشىن قىلمىستىق جاۋاپكەرشىلىككە تارتامىز دەپ قورقىتىپ، ازاماتتاردى نەسيە الۋعا، مۇلكىن ساتۋعا جانە دەپوزيتتەگى قاراجاتتى دروپتاردىڭ شوتىنا اۋدارۋعا ماجبۇرلەگەن. وسىلايشا پسيحولوگيالىق قىسىم جاساعان. توپ ناقتى يەرارحيادان تۇرعان. اركىم ءوز ءرولىن اتقارعان. وندا اكىمشىلەر، HR-مەنەدجەرلەر، "كلوۋزەرلەر"، تەحنيكالىق قىزمەتكەرلەر، ءتىپتى "كۇشتىك بلوك" بولعان.
قىلمىستىق جولمەن الىنعان اقشا call-ورتالىقتىڭ جۇمىسىنا، كولىك ساتىپ الۋعا جانە تاعى دا باسقا نارسەلەرگە جۇمسالدى. "كەڭسەنى" ۇستاۋ ءۇشىن ۇيىمداستىرۋشىلار ايىنا 60 مىڭ اقش دوللارىن جاراتقان، ال كۇدىكتىلەردىڭ ءبىرى سوڭعى التى ايدا بەس كولىك ساتىپ العان. ءبىر مەزگىلدە كۇدىكتىلەردىڭ تۇرعىلىقتى مەكەنجايلارى بويىنشا جانە سall-ورتالىقتىڭ وزىندە جۇرگىزىلگەن ءتىنتۋ بارىسىندا 30-دان اسا كومپيۋتەرلىك تەحنيكا، 79 ۇيالى تەلەفون، sim-كارتالار، نىساندى كيىم-كەشەك، قۇقىق قورعاۋ جانە ارنايى ورگانداردىڭ، ۇلتتىق بانكتىڭ قىزمەتكەرلەرىنىڭ جالعان كۋالىكتەرى، ازاماتتاردى الداۋعا ارنالعان ءتۇرلى جاۋاپ نۇسقالارى بار الدىن الا دايىندالعان سەنارييلەر، سونداي-اق باسقا دا ايعاقتار تاركىلەندى"، - دەدى ق ر ءىىم كيبەرقىلمىسقا قارسى ءىس-قيمىل دەپارتامەنتى باستىعىنىڭ ورىنباسارى اسلان وسكەمبايەۆ.
تاركىلەنگەن قۇرىلعىلاردا deepfake تەحنولوگياسى ارقىلى بەينە مەن داۋىستى وزگەرتۋگە ارنالعان ارنايى باعدارلامالىق جاساقتاما تابىلعان. الدىن الا مالىمەت بويىنشا قاسكۇنەمدەر قازاقستان تۇرعىندارىن 900 ميلليون تەڭگەدەن اسا سوماعا الداعان. ارنايى وپەراسيا ناتيجەسىندە ۋكراينانىڭ توعىز ازاماتى ۇستالىپ، ونىڭ بەسەۋى قاماۋعا الىندى.
