Úkimette Premer-ministrdiń orynbasary – mádeniet jáne aqparat ministri Aida Balaevanyń tóraǵalyǵymen Balalardyń jazǵy demalysyn uiymdastyrý jónindegi respýblikalyq shtabtyń ekinshi otyrysy ótti, dep habarlaidy dalanews.kz.
Jiynǵa oqý-aǵartý ministri Juldyz Súleimenova, densaýlyq saqtaý vitse-ministri Timýr Muratov, tótenshe jaǵdailar vitse-ministri Kegen Tursynbaev, sondai-aq ortalyq memlekettik organdardyń ókilderi men oblys ákimderiniń orynbasarlary qatysty.
Otyrys balalardyń jazǵy demalys kezindegi qaýipsizdigin qamtamasyz etý máselelerine arnaldy.
Juldyz Súleimenova balalardyń jazǵy demalysyn uiymdastyrý barysy týraly baiandady. Búginde 10,8 myń uiymda 3,2 mln-nan astam bala jazǵy demalyspen qamtylǵan. Onyń ishinde jyl boiy jáne maýsymdyq jumys isteitin 176 ortalyqta 116 myńnan astam bala saýyqtyrýdan ótse, taǵy 3,1 mln-nan astam bala 10, 7 myńnan astam mektep janyndaǵy lager men qosymsha bilim berý uiymynda demalǵan.
Litsenziialaý máselelerine de erekshe nazar aýdaryldy. Biyl alǵash ret bilim berý jáne saýyqtyrý qyzmetterin kórsetetin uiymdardy mindetti litsenziialaý tártibi engizildi. Qaýipsizdik, kadrlyq qamtamasyz etý, tamaqtandyrýdy uiymdastyrý, meditsinalyq súiemeldeý jáne saýyqtyrý baǵdarlamalarynyń mazmuny boiynsha biryńǵai talaptar belgilendi. Qazirgi ýaqytta 64 ortalyq litsenziia aldy, taǵy 45 ótinim qaralyp jatyr.
Densaýlyq saqtaý vitse-ministri Timýr Muratov sanitariialyq-epidemiologiialyq qaýipsizdikti qamtamasyz etý sharalary týraly habarlady. Qazirgi ýaqytta sanitariialyq-epidemiologiialyq qorytyndy alý úshin 189 ótinish túsken. Onyń ishinde 180 nysanǵa oń qorytyndy berildi. Qorytyndy beriler aldynda árbir nysan sanitariialyq talaptarǵa sáikestigi boiynsha mindetti tekserýden ótedi. Onyń aiasynda aýyzsýǵa, basseinderdegi sýǵa, jaǵajailardaǵy topyraq pen qumǵa zerthanalyq zertteýler júrgiziledi.
Balalardyń qaýipsizdigin qamtamasyz etý sharalary týraly Tótenshe jaǵdailar vitse-ministri Kegen Tursynbaev baiandady. Jazǵy maýsym bastalǵanǵa deiin vedomstvo ákimdiktermen birlesip 220 balalar lagerine tekserý júrgizgen. Nátijesinde 78 saýyqtyrý uiymynan órt qaýipsizdigi talaptarynyń 756 buzýshylyǵy anyqtalǵan.
Sonymen qatar jazǵy saýyqtyrý naýqanynyń alǵashqy aptalarynda tirkelgen tótenshe oqiǵalar jeke qaraldy. Barlyq jaǵdaida memlekettik organdardyń is-qimyly ýaqtyly úilestirilip, balalar jedel túrde qaýipsiz oryndarǵa kóshirilgeni jáne qajetti meditsinalyq súiemeldeý uiymdastyrylǵany atap ótildi.
Otyrysty qorytyndylaǵan Aida Balaeva halyq arasynda jazǵy demalys kezindegi qaýipsizdik erejelerin túsindirý jumystaryn kúsheitýdi tapsyrdy. Sondai-aq sanitariialyq-epidemiologiialyq, órtke qarsy jáne qoǵamdyq baqylaýdy kúsheitip, balalardyń demalys, ekskýrsiialar men ózge de is-sharalar kezindegi qaýipsizdigin qamtamasyz etý qajettigin atap ótti. Premer-ministrdiń orynbasary kúnniń qalyptan tys ystyq bolýyna bailanysty jumysty kúsheitýge, onyń ishinde balalarǵa beriletin taǵamnyń sapasyn turaqty baqylaýda ustaýǵa erekshe nazar aýdardy.
