Qazaqstan Úkimeti Memleket basshysy Qasym-Jomart Toqaevtyń tapsyrmasymen elimizdiń jylý elektr keshenin aýqymdy jańǵyrtý boiynsha jumystardy jalǵastyryp jatyr, dep habarlaidy Dalanews.kz.
QR Premer-Ministri Oljas Bektenov Kentaý, Ridder jáne Qyzylorda qalalaryndaǵy jylý kózderine rekonstrýktsiia jáne kúrdeli jóndeý júrgizý úshin Úkimet rezervinen qarajat bólý týraly qaýlylarǵa qol qoidy.
"Atap aitqanda, Kentaýdaǵy JEO-5-tiń № 7, 8, 9, 10, 11 jáne 12 qazandyqtaryn rekonstrýktsiialaýǵa 9 mlrd teńgeden astam, Ridder jylý elektr ortalyǵynyń tehnologiialyq jabdyqtary men infraqurylymyna kúrdeli jóndeý júrgizýge – 4,9 mlrd teńge, al Qyzylordadaǵy ońtústik qazandyqtyń úsh bý qazandyǵyn rekonstrýktsiialaýǵa – 2 mlrd teńgeden sál astam qarajat bólindi. Osylaisha, atalǵan jylý kózderin jańǵyrtýǵa jalpy somasy shamamen 16 mlrd teńge baǵyttaldy", - dep jazylǵan habarlamada.
Qabyldanyp jatqan sharalar aldymyzdaǵy jylytý maýsymynda Kentaý, Ridder jáne Qyzylorda turǵyndaryn jylýmen turaqty qamtamasyz etýge múmkindik bermek.
"Jalpy elimiz boiynsha aldaǵy jylytý maýsymyna daiyndyq sheńberinde Astana, Almaty, Shymkent, Atyraý, Óskemen, Qaraǵandy, Aqtaý, Taraz, Petropavl, Pavlodar, Jezqazǵan, Aqtóbe, Ekibastuz, Stepnogor, Rýdnyi, Balqash jáne Aqsý qalalaryndaǵy 10 energoblok, 55 qazandyq pen 45 týrbinaǵa jóndeý jumystaryn júrgizý josparlanǵan.
Sonymen qatar investitsiialyq kelisimder aiasynda osy kúnderi Ekibastuzdaǵy GRES-1-diń №1 energoblogynda qalpyna keltirý jáne Atyraýdaǵy JEO men Topardaǵy GRES-te týrboagregattardy aýystyrý jumystary júrgizilip jatyr. Budan bólek, Ekibastuz GRES-inde №3 energoblok qurylysy, sondai-aq Óskemendegi JEO men Qaraǵandydaǵy JEO-3-ti keńeitý boiynsha jobalar josparlanǵan", - dep málimdedi.
Joǵaryda atalǵan barlyq jobany júzege asyrý ortaq jiyntyǵy 1500 MVt-tan astam jańa qýatty iske qosýǵa múmkindik beredi.
