Qazaqstan Úkimeti Memleket basshysynyń áleýmettik infraqurylym nysandaryn salý jónindegi tapsyrmalaryn, onyń ishinde elge qaitarylǵan aktivter esebinen júzege asyrýdy jalǵastyrýda. Osy maqsatta Arnaýly memlekettik qordan Soltústik Qazaqstan oblysyndaǵy Presnov jáne Sokolov toptyq sý qubyrlaryn rekonstrýktsiialaýdy aiaqtaýǵa 2,7 mlrd teńge bólindi, dep habarlaidy dalanews.kz.
Presnov toptyq sý qubyryn rekonstrýktsiialaý jalpy sany 34,5 myń adam turatyn Esil, Mamliýt jáne Jambyl aýdandaryndaǵy 43 eldi mekendi sýmen jabdyqtaýdy jaqsartýǵa múmkindik beredi. Búginde 171 shaqyrym magistraldyq sý qubyry men taratý jelileri, sondai-aq 46 shaqyrym aýylishilik sý jelileri tartyldy. Sýdy jinaqtaýǵa, taratýǵa jáne qajetti sý qysymyn qamtamasyz etýge arnalǵan qysym rettegish qurylystaryn salý jáne jańartý jumystary jalǵasýda.
Sokolov toptyq sý qubyryn rekonstrýktsiialaý jumystary Qyzyljar aýdanyndaǵy jalpy sany 4 myńnan astam adam turatyn 10 aýyldy qamtidy. Joba aiasynda 59 shaqyrym taratý jelisi men 77 shaqyrym aýylishilik sý jelisi salynady.
Presnov jáne Sokolov sý qubyrlaryn paidalanýǵa berý 2026 jyldyń sońyna josparlanǵan. Nátijesinde júieniń senimdiligi artyp, sý tasymaldaý kezindegi shyǵyndar qysqaryp, joba qamtyǵan eldi mekenderdiń turǵyndaryna aýyz sýdy jetkizý sapasy jaqsarady.
Soltústik Qazaqstan oblysynda elimizdegi eń uzyn toptyq sý qubyrlary jelisi ornalasqan – onyń uzyndyǵy 3 myń shaqyrymnan asady jáne ol jalpy sany 175 myń adam turatyn 229 aýyldy sýmen qamtamasyz etedi. 2025 jyly Arnaýly memlekettik qordan atalǵan infraqurylymdy damytýǵa 45 mlrd teńgeden astam qarajat bólindi, bul 48 jobany qarjylandyrýǵa múmkindik berdi.
Aita keteiik, 2024 jyldan 2026 jylǵa deiingi aralyqta Arnaýly memlekettik qor qarajaty esebinen Úkimet jalpy somasy 610 mlrd teńge bolatyn 500-den astam áleýmettik jobany qarjylandyrýdy maquldady, olardyń basym bóligi paidalanýǵa berilgen. Onyń ishinde jalpy somasy 226,5 mlrd teńge bolatyn 267 joba sý infraqurylymyn damytýǵa baǵyttalǵan.
