Premer-mınıstr Oljas Bektenov Úkimet pen ákimder jumysynyń tıimdiligi, eń aldymen, azamattardyń ómir súrý sapasyn jaqsartý boıynsha baǵalanatynyn atap ótti, dep habarlaıdy Dalanews.kz.
"Búgingi tańda barlyq áleýmettik mindettemeler tolyq kólemde oryndalýda. Kelesi jyly áleýmettik qajettilikterge bólinetin shyǵystardyń paıyzdyq araqatynasyn ońtaılandyrý júrgiziledi. Qarajatty teńgerimdi jumsaý maqsatynda memlekettik qoldaý sharalarynyń biryńǵaı sıfrlyq platformasy ázirlendi. Negizgi maqsat – resýrstardy shyn máninde kómekke muqtaj jandardyń paıdasyna qaıta bólý.
Memleket basshysy atap ótkendeı, biz masyldyq psıhologıaǵa tosqaýyl qoıýymyz kerek. Sıfrlandyrýdyń arqasynda biz tabysy joǵary otbasylarǵa kórsetiletin memlekettik qoldaý sharalaryn toqtatyp, bul qarajatty qıyn jaǵdaıǵa tap bolǵan adamdarǵa baǵyttaýdy josparlap otyrmyz", - dep atap ótti premer-mınıstr.
Qazirgi ýaqytta skorıng júıesin synaqtan ótkizý úshin Shymkent qalasy men Qaraǵandy oblysynda pılottyq joba júrgizilip jatyr.
