Qazaqstan úkimeti Densaýlyq saqtaý ministrligi men Qaraǵandy farmatsevtikalyq kesheni arasyndaǵy óndiristik qýattardy salý jáne jańǵyrtý jónindegi investitsiialyq kelisimdi bekitti, dep habarlaidy dalanews.kz.
Joba prezident Qasym-Jomart Toqaev júktegen importty almastyrý jáne otandyq dári-dármek óndirisiniń úlesin arttyrý jónindegi tapsyrmalar aiasynda júzege asyrylmaq. Tiisti qaýlyǵa premer-ministr Oljas Bektenov qol qoiǵan.
Jobaǵa salynatyn jeke investitsiia kólemi 42,5 mlrd teńgeni quraidy. Bul bastama farmatsevtika salasyndaǵy iri investitsiialyq jobalardyń biri bolmaq. Ol dári-dármek óndirisin tereń lokalizatsiialaýǵa jáne joǵary tehnologiialyq óndiristik qýattardy damytýǵa baǵyttalǵan.
Kásiporynda 74 túrli dárilik preparat shyǵarý josparlanyp otyr. Óndiris jelisi onkologiialyq, aýtoimmýndyq jáne orfandyq aýrýlardy emdeýge arnalǵan innovatsiialyq dárilerdi qamtidy. Sonymen qatar zaýyt áleýmettik mańyzy bar aýrýlardyń aldyn alý men emdeýge qajetti immýnobiologiialyq jáne ózge de joǵary tehnologiialyq preparattardy óndiredi. Budan bólek, álemdik standarttarǵa sai belsendi farmatsevtikalyq ingredientterdi, biologiialyq jáne biotehnologiialyq ónimderdi sintezdeý jolǵa qoiylmaq.
Jobany iske asyrý eldiń dárilik qaýipsizdigin kúsheitip, Qaraǵandyda zamanaýi farmatsevtikalyq óndiris infraqurylymyn qalyptastyrýǵa múmkindik beredi. Sonyń nátijesinde shamamen 70 jańa jumys orny ashylady.
Jalpy, Qazaqstannyń farmatsevtika salasy turaqty ósim kórsetip keledi. Ótken jyldyń qorytyndysy boiynsha farmatsevtikalyq ónim óndirisiniń kólemi 191,1 mlrd teńgege jetip, 2024 jylmen salystyrǵanda 8,7%-ǵa artqan. Al salaǵa tartylǵan investitsiia kólemi 91,3 mln dollardan 142,8 mln dollarǵa deiin ósken.
2025 jyldyń jeltoqsanynan beri farmatsevtika salasynda jalpy somasy 360 mlrd teńgege jetetin jeti investitsiialyq kelisim jasalǵan. Bul jobalar shamamen 474 túrli dárilik zat óndirýge jáne 1170-ten astam turaqty jumys ornyn ashýǵa múmkindik beredi.
