Qaita qaralǵan biylǵy biýdjet jobasynda Resei "Baiqońyr" kesheni úshin osy jyly 52 mlrd 143,5 mln teńge jáne áskeri poligondarǵa – 9 mlrd 217,9 mln teńge jaldaý aqysyn tóleýge tiis bolady.
Vitse-premer – Qarjy ministri Erulan Jamaýbaevtyń aitýynsha, bul ózgeris "teńge baǵamynyń AQSh dollaryna shaqqanda naqty ózgerýine bailanysty" eken. Eki el arasyndaǵy mámile boiynsha ǵarysh ailaǵy keshenin qoldanǵany úshin Máskeý jyl saiyn respýblikamyzǵa 115 mln dollar tólep turady.
Ótken jylǵy jeltoqsanda biylǵy biýdjetti qabyldaý barysynda 1 dollar = 425 teńge degen baǵam qoldanylypty. Endi biýdjet jobasyn qaita qaraǵan kezde 1 dollar 453 teńgege teń dep alynady.
Biylǵy 9 naýryzda amerikalyq valiýta 510 teńgege deiin qymbattaǵany málim. Eger jyl sońyna deiin baǵam sol shamaǵa barsa, "Baiqońyr" Kremlge 58 mlrd 650 mln teńgege túspek.
Birqatar sarapshylardyń dereginshe, Máskeý kosmodromdy jaldaý aqysyn da dollardan rýblge kóshirýdi qalaityn kórinedi. Qazaqstan bolsa, dollardy qoldap, soǵan tabandaýy kerek. Bul bizge qolaily.
Qazaq jerindegi ǵarysh ailaǵy 1994 jyly Reseige 20 jylǵa arendaǵa berilgen bolatyn. Keiin, 2004 jyly eki el kelisimdi uzartýǵa ýaǵdalasty. Nátijesinde, Qazaqstan "Baiqońyr" keshenin qalamen jáne onyń aimaǵyndaǵy jerimen birge 2050 jylǵa deiin Reseige jalǵa berdi.
– Negizi, "Baiqońyr" keshenin jalǵa berý sheshimi 1994 jyly qabyldandy, sol kezde aýyr ekonomikalyq jaǵdaiǵa bailanysty Qazaqstannyń ony ustap turýǵa jáne paidalanýǵa múmkindigi bolmady. Bekitilgen kelisimge sáikes, Resei Baiqońyr qalasyn jáne kosmodromdy ustap turý jóninde ózine mindetteme aldy. "Baiqońyr" saqtaldy jáne jumys istep tur. Respýblikalyq biýdjetke jyl saiyn 115 mln dollar jaldaý tólemi túsip turady. Keiingi 27 jyl ishinde keshendi jalǵa berýden Qazaqstan 3 mlrd dollardan astam tabys tapty, – deidi Tsifrlyq damý, innovatsiialar jáne aeroǵarysh ónerkásibi ministri Baǵdat Mýsin.
Ekonomikalyq turǵydan ǵarysh keshenin jalǵa berý paidaly bolǵanymen, qazaqstandyq qoǵam, sarapshylar munyń ózge qyrlaryna alańdaýshylyq bildirip júr. Mysaly, ekologiiany buzady. Baiqońyr qalasyndaǵy 12 mekteptiń tek beseýi ǵana qazaqstandyq standartpen oqytady, qalǵany Reseige baǵynady. Olarda qazaqstandyq balalar "Prezidentim Pýtin, astanam Máskeý" dep oqytylatyn kórinedi, qazaq tili, qazaq ádebieti men Qazaqstan tarihyn pánin oqymaidy.
Qaladaǵy balabaqshalardyń jaǵdaiy da solai. 2020 jyly qazaqstandyq bilim berý standartyna negizdelgen 2 jeke balabaqsha ǵana ashylypty. Reseilikter bul qalany óz jerindei sezinedi.
Ótkende "Roskosmos" basshysy Dmitrii Rogozin Qazaqstannyń Aqparat jáne qoǵamdyq damý ministri Asqar Omarovty ultjandylyǵy úshin unatpai, qazaq ministriniń qazaq jerindegi "Baiqońyrǵa barýyna tyiym salatynyn" málimdegeni bar. Resei Baiqońyrǵa áskeri, saýytty tehnikalaryn engizip jáne keri qaitaryp, eldiń záresin ushyratyny da jasyryn emes...
