Ánshi Toqtar Serikov "Ýaqyt kórsetedi" baǵdarlamasynda qalyń kórermendi qyzyqtyrǵan suraqqa jaýap berip, ne sebepti áleýmettik jelide otbasylyq jáne jeke ómiri jaily jazbalar jariialamaitynyn ashyq aitty, dep habarlaidy dalanews.kz.
Baǵdarlama júrgizýshisi Nurseiit Jylqyshybaidyń "Kóp áriptesterińiz ishken-jegenin, jetken jetistigin kórsetip otyrady. Al siz ózgeshesiz. Mundai qarapaiymdyqty qaidan aldyńyz?" degen saýalyna óner iesi shynaiy jaýap qaiyrdy.
"Bul suraqqa jaýap bersem, kópshilikten oqshaýlanyp qalatyndai sezinem. Biraq shyndyqty aitsam, jubaiymmen aqyldasyp, Instagram jelisine jeke ómirimizdi jariialamaýdy jón kórdik. Ne iship, ne jegenimizdi, qandai kólik minip, qai úide turatynymyzdy, tipti bala-shaǵamnyń sanyn da kórsetkim kelmeidi. Men bar jaǵdaiymmen shúkirshilik etip otyrǵan adammyn. Alaida elimizde áli de turmysy tómen, kún kórisi qiyndaǵan jandar bar. Balasynyń bolashaǵyna alańdap, kózine jas alǵan ata-analar bar. Sondai sátterdi oilasam, kóńilim qulazidy. Ózim maqtanyp jatqanda, bir adam maǵan muńaiyp qarap tursa, bul – men úshin úlken syn. Sondyqtan ónerdegi barsha áriptesterime aitarym: bul – jyltyrap, maqtanyp otyratyn emes, kerisinshe, bailyǵyńdy jasyratyn zaman. Ash adamdy toidyryp baryp maqtan. Keide ózimdi syrttan túsirip alǵan videolardy kórgende uialyp, ókinetin sátterim bolady", – dep shyn kóńilmen bólisti.
