12 aqpanda Astana qalasynyń halyqaralyq áýejaiynda Dýbai qalasynda (BAÁ) ótken UAE SWAT Challenge-2026 saiysynyń jeńimpazdary men qatysýshylaryn saltanatty túrde qarsy alý sharasy boldy, dep habarlaidy Dalanews.kz.
QR Memlekettik kúzet qyzmeti, QR Ulttyq qaýipsizdik komiteti, QR Ishki ister ministrligi arnaiy maqsattaǵy bólimsheleriniń úzdik jaýyngerleri birikken bes qurama komanda 7-11 aqpanda BAÁ-de jetinshi ret ótkizilgen “Arnaiy jasaq olimpiadasy” sanalatyn halyqaralyq aitýly týrnirden jeńispen oraldy.
UAE SWAT Challenge-2026 jalpy qorytyndysy boiynsha “Kazakhstan C” quramasy altyn júldege ie boldy. Jeńis qýanyshyn “Kazakhstan A” komandasy eseledi, ol aitýly álemdik týrnirdiń ekinshi ornyn jeńip aldy. Taǵy úsh qurama 48 elden kelgen 109 komanda ishindegi 20 úzdik qataryna kirdi.
Qazaqstan arnaiy maqsattaǵy bólimsheleriniń komandalary álem aldynda teńdessiz dene daiyndyǵyn, múltiksiz komandalyq yntymaq úlgisin kórsetip, jeńis jolynda janyn aiaǵan joq. Olardyń biri, “Tomiris” qyzdar quramasy álem jankúierleriniń erekshe nazaryna ie boldy. Týrnirdiń árbir kezeńinde ol áielder komandalarynyń úzdigi boldy ári jalpy esepte ondaǵan erler quramalaryn artta qaldyrdy. UAE SWAT Challenge saiyskerleri taktikalyq operatsiialar, ǵimarat pen munarany basyp alý, kepilge alynǵandardy jáne ofitserlerdi qutqarý, sondai-aq keshendi kedergiler jolaǵynan ótý sekildi bes arnaýly tapsyrmany oryndady.
Ótken jyldarda da osy saiysta Qazaqstan arnaiy maqsattaǵy bólimsheler komandalary júldeli oryndarmen oralǵan bolatyn.
Otandyq komandalarǵa Qazaqstan Respýblikasynyń Prezidenti Qasym-Jomart Toqaev quttyqtaý joldady. Prezident jaýyngerlerdiń úzdik daiarlyǵyn, jeńiske degen ynta-jigerin jáne biik patriottyq rýhyn atap ótti.
