Tarazdy taǵy da tútin basty. Bul joly turǵyndar óndiris oryndarynan shyqqan iiske emes, qoqys poligonyndaǵy órtten taraǵan tútinge shaǵymdanyp otyr. Jaz mezgili bastalyp, kún qyza salysymen qala mańyndaǵy qoqys alańy jii órtenip, jurt qolqany qabatyn iisten mezi bolǵan, dep habarlaidy dalanews.kz astanatv-ǵa siltep.
Qala aspanyn qara tútin japqanda turǵyndar órt qoqys poligonynan shyqqanyn birden ańǵarǵan. Olardyń aitýynsha, qoiý tútin men jaǵymsyz iis tynys alýdy qiyndatqan.
Jalyn az ýaqyt ishinde 2 gektardan asa aýmaqty sharpyǵan. Tarazdyń turmystyq qaldyqtar poligony qaladan shamamen 5 shaqyrym jerde ornalasqan.
Turǵyndardyń sózinshe, mundai jaǵdai alǵash ret bolyp otyrǵan joq. Qala mańyndaǵy qoqys alańynyń aýmaǵy 30 gektardy alyp jatyr. Onda 3 million tonnadan asa qaldyq jinalǵan. Poligon qorshalǵanymen, qoqys kólemi jyl saiyn artyp keledi.
Qala ákiminiń orynbasary Damir Jamanbaev "órt qasaqana qoiylǵany" týraly aqparat rastalmaǵanyn aitty. Onyń pikirinshe, órttiń shyǵýyna aýa raiy men poligon aýmaǵyndaǵy shyny sekildi zattar sebep bolýy múmkin.
Al ekologtar mundai órtter adam densaýlyǵyna aitarlyqtai qaýip tóndiretinin eskertti. Mamandardyń aitýynsha, qoqys janǵan kezde aýaǵa ziian jáne kantserogen zattar bólinedi. Jeldiń baǵytyna qarai olar qala aýmaǵyna taralýy yqtimal.
Bul poligon qala ákimdigine qarasty "Jasyl-El Taraz" seriktestiginiń teńgeriminde. Ekologiia departamenti sanitariialyq-qorǵaý aimaǵynda aýa sapasyna jedel tekseris júrgizip, kómirtek totyǵy, azot pen kúkirt dioksidiniń mólsheri ruqsat etilgen deńgeiden joǵary ekenin anyqtaǵan.
Osyǵan bailanysty Ekologiia departamenti mekemege jospardan tys tekseris júrgizýdi josparlap otyr.
