Saltanatty shara Qazaqstannyń Túrkiiadaǵy elshiliginiń uiymdastyrýymen, Ál-Farabi atyndaǵy Qazaq ulttyq ýniversitetiniń qoldaýymen HVI-halyqaralyq Ankara kitap kórmesi aiasynda júzege asty.
Jinaqtyń alǵysózin bilim ordasynyń basshysy Janseiit Túimebaev jazyp, QazUÝ túlegi ári qyzmetkeri Nurǵali Orazdyń qazaq ádebietine qosqan úlesi men qalamgerlik qýatyna toqtalǵan. M.Áýezov, Z.Qabdolov, M.Qarataev siiaqty ádebiet alyptary qazaq bilimi men ǵylymynyń qara shańyraǵynda oqyp, qyzmet etip, ózindik mektep qalyptastyrǵanyn baiandai kele, osy mektepten tálim alǵan jazýshynyń shyǵarmashylyq jolyn saraptaidy.
Sondai-aq qarymdy qalamgerdiń súbeli týyndary el egemendigin alǵannan keiin dúniege kelip, qandai qiyn-qystaý zaman bolmasyn óz shyǵarmashylyǵyna adaldyq tanytqanyn jetkizedi. Jazýshynyń qaitalanbas qoltańbasyna, keiipkerleriniń san alýandyǵyna, oiynyń tereńdigine, kemeldigine mańyz beredi. Túrik tiline tárjimalanǵan «Qazyǵurt oqiǵalary» áńgimeler jinaǵynyń týys halyqtardy ádebiet arqyly jaqyndastyra túserine úmit artady.
Jańa jinaqtyń Ankara tórindegi tanystyrylymynda Qazaqstannyń Túrkiiadaǵy elshisi Abzal Saparbekuly toptamanyń Táýelsizdiktiń 30 jyldyǵy, Túrkiia Respýblikasynyń 100 jyldyǵy qarsańynda oqyrman qolyna tigenin, jinaqqa engen «Baqyt qusy», «Jalǵyz aral», «Túrik aspanyndaǵy qazaq juldyzy», «Aq tyrnalar uiasy», «Qazyǵurt oqiǵasy» týyndylarynyń túrik aǵaiyndardyń kóńilinen shyǵaryna senim bildirdi.
Eýraziia Jazýshylar odaǵynyń tóraǵasy Iakýp Ómeroǵlý ózi basqaratyn «Bengý» baspasynan jaryq kórgen týyndynyń tarihi-mádeni salmaǵyn sipattap, Qazyǵurt taýlaryn kórip ósken qalamgerdiń sýretkerlik qyryn joǵary baǵalady.
Eýraziia Jazýshylar odaǵynyń basqarma múshesi, kitap aýdarmashylarynyń biri Jámila Kynajy qazaq ádebietiniń beldi ókili N.Orazdyń jazýshylyq stili men janrlyq erekshelikteri týraly baiandama jasap, ár shyǵarmanyń arqalaǵan júgi men kótergen mindetin jan-jaqty tanystyryp ótti.
Jazýshy Nurǵali Oraz óz kezeginde buǵan deiin jekelegen áńgimeleri túrik tiline aýdarylǵanymen, alǵash ret jeke kitap retinde jaryq kórgenin jetkizip, sharany uiymdastyrýshylarǵa rizashylyǵyn bildirdi.
Sońynan Elshi Abzal Saparbekuly jazýshy Nurǵali Orazǵa, Eýraziia jazýshylar odaǵynyń Tóraǵasy Iakýp Ómeroǵlýǵa, aýdarmashylar Málik Otarbaevqa, Jamilá Kynajyǵa, Ashýr Ózdemirge alǵys bildirip, alǵys plaketkalaryn tapsyrdy.
