Túrkistannyń jastary kópbalaly-jalǵyzbasty anaǵa úi salyp berdi
Qasietti Ramazan aiynda izgi amal jasaý túrkistandyq jastar arasynda dástúrge ainalǵan. Jyldaǵy úrdis boiynsha «Bekzat» móltek aýdanynyń 1990 jyly týǵan er azamattary bas qosyp, baspana salǵan bolatyn. Búgin turmystyq tehnikalarmen jabdyqtalǵan 4 bólmeli úidi 6 perzenttiń anasy Nurgúl Álibaevaǵa tabystady, – dep habarlaidy Dalanews.kz Túrkistan oblysynyń Óńirlik kommýnikatsiialar qyzmetine silteme jasap.
Kópbalaly ana birneshe jyldan beri páter jaldap kúneltip kelgen. 2017 jyly jubaiy dúnie salǵan jalǵyzbasty ana Erǵazy, Erasyl, Eraly, Erbulan, Ersultan jáne Qaraqat esimdi ul-qyzdy tárbielep otyr. Óz kezeginde qaiyrymdy istiń sharapatyn kórgen Nurgúl Jumabaiqyzy jaqsylyqqa jany qumar jandarǵa alǵysyn bildirdi.
– Qurylys jumystaryn túgeldei ózimiz júrgizdik. Aqyldasa kele jańa úidi kópbalaly anaǵa syilaýdy jón sanadyq. Baspanaly bolyp, tóbesi kókke eki eli jetpei turǵan otbasy músheleriniń júzindegi qýanyshty kórip, marqaiyp qaldyq. Kópshilikpen jinalǵan qarajatqa úidi zaman talabyna sai etip turǵyzdyq. Atsalysqan barlyq azamattarǵa, demeýshilerge Alla razy bolsyn, – dedi uiymdastyrýshylardyń biri Jalǵas Sabyrov.
Aita keteiik, Bekzat Sattarhanov atyndaǵy móltek aýdanynyń 1982 jyly týǵan azamattary 20 jyldyq túlekter kezdesý keshinde muqtaj januiaǵa baspana syilaǵan bolatyn. Aǵa býyn elge taǵzym jasaýda jastarǵa osylaisha úlgi kórsetken. Keiin, 1988 jáne 1989 jyly týǵan azamattar da Áz-naýryz merekesi qarsańynda eki otbasynyń baspanaly bolýyna sebepshi bolǵan. Endi 1991 jyly týǵan jigitter de qaiyrymdylyq estafetasyn kelesi jyly jalǵastyrýǵa nietti.
