Qazaqstan Senaty Túrkistan qalasyna erekshe mártebe berýdi kózdeıtin zańdy eki oqylymda maquldap, ony Prezıdent Qasym-Jomart Toqaevtyń qol qoıýyna jiberdi. Bul qujat qalanyń tarıhı-mádenı murasyn saqtaý men damytýǵa, sondaı-aq basqarý júıesin jetildirýge baǵyttalǵan, dep habarlaıdy Dalanews.kz.
Qandaı ózgerister bolady?
Jańa zańnyń negizgi mindetteri:
- Túrkistannyń tarıhı jáne mádenı mura obektileriniń tutastyǵyn saqtaý, olardy tıimdi basqarý júıesin qurý;
- Qoja Ahmet Iasaýı kesenesi men onyń qorǵalatyn aımaǵynda arheologıalyq jáne ǵylymı-restavrasıalyq jumystardy josparlaý jáne júrgizý;
- Túrkistannyń tarıhı-mádenı murasyn saqtaý, damytý jáne qaıta jańǵyrtý, ulttyq qolónerdi órkendetý.
Arhıtektýralyq shekteýler
Senator Baýyrjan Qanıevtiń aıtýynsha, Qoja Ahmet Iasaýı kesenesiniń biregeıligin saqtaý jáne onyń aınalasyndaǵy tyǵyz qurylysqa jol bermeý úshin belgili bir shekteýler engiziledi.
“Mavzoleıdiń 100 metrlik qorǵanys aımaǵy sheńberinde bıiktigi jeti metrden joǵary ǵımarattar salýǵa jáne tarıhı-mádenı eskertkishtermen úılespeıtin kólemdi, tústi nemese qurylys materıaldary qoldanylǵan nysandardy turǵyzýǵa tyıym salynady” – dedi senator.
Sonymen qatar, bul zań Túrkistannyń tarıhı-mádenı qundylyqtaryn saqtaý men damytýdyń naqty mehanızmderin bekitedi. Qala óziniń ulttyq jáne tarıhı ereksheligin saqtaı otyryp, mańyzdy rýhanı jáne týrısik ortalyq retinde qalyptasady.
Endi qujat Memleket basshysynyń qol qoıýyn kútýde. Eger zań kúshine ense, Túrkistannyń sáýlettik kelbetin retteýden bastap, mádenı murany qorǵaýǵa deıingi jańa erejeler resmı túrde iske qosylady.
