Aýqymdy sharaǵa otandyq jáne sheteldik, atap aitqanda Túrkiia, Resei, Ózbekstan, Ázerbaijan, Qyrǵyzstan elderiniń tarih, restavratsiia, sáýlet óneri, mádeniettaný salalary boiynsha maman-ǵalymdary, tarihi-mádeni muralardy qorǵaý ókilderi, qoryq jáne tarihi-ólketaný mýzeileri men ǵylymi-zertteý uiymdarynyń qyzmetkerleri qatysty.
Halyqaralyq jiynda álemdik mura obektilerindegi qalpyna keltirý jáne basqarý, oqý oryndarynda restavratorlardy daiarlaý, menedjment jospardy ázirleý jáne qoldaný, tarihi-mádeni eskertkishterdi saqtaýǵa baǵyttalǵan ozyq tehnologiialardy qoldaný, diagnostikalyq-monitoringtik zertteýler, sońǵy zamanaýi tsifrlyq qurylǵylardy paidalaný, Qazaqstandaǵy tarihi-mádeni muralardy qorǵaý týraly taqyryptar aiasynda talqylaýlar júrgizilip, ózekti máseleler saralandy.
Konferentsiiada sóz alǵan Túrkistan oblysy ákiminiń orynbasary Beisen Tájibaev Orta Aziia men Qazaqstan boiynsha teńdesi joq keseneni qorǵaýdyń mańyzdylyǵyna toqtaldy.
– Qoja Ahmet Iasaýi kesenesin qorǵaý, saqtaý jáne asyl jaýharymyzdy búkil álemge nasihattaý – búgingi konferentsiia aiasynda ǵana emes, únemi qozǵalatyn taqyryp. Bul baǵytta osyǵan deiin de birqatar jumys atqarylyp, halyqaralyq deńgeidegi is-sharalar ótkizildi.
Elimizdiń rýhani astanasyna jasaǵan saparlaryńyz sátti bolsyn. Mádeni murany qorǵaýdy maqsat etken ǵalymdar men mamandar tarihtyń tereń zerttelýine, eskertkishterdi janashyrlyqpen qorǵaýǵa, ulttyq biregeilikti nyǵaitýǵa aitarlyqtai úles qosady dep senemiz.
Atalǵan baǵyttaǵy sharalar birkúndik emes, turaqty negizde jalǵasyn tabatyn josparǵa ainalýy kerek.
Biyl Túrkistan oblysynyń qurylýyna 5 jyl tolyp otyr. Tiisinshe, Prezident Qasym-Jomart Toqaevtyń bastamasymen Túrkistanǵa tarihi jáne rýhani elorda statýsyn berý jumystary júrgizilip keledi. Osy statýs berilgennen keiin de mádeni muralardy zertteý jáne qorǵaý jumystary kúsheitile túsedi. Túrki álemi ǵalymdarynyń Túrkistandy zertteýge erekshe kóńil bólýi bizdi qýantady. Sondyqtan barlyq baǵytta birlesip jumys atqarýǵa daiynbyz, – dedi Beisen Tájibaev.
600 jyldyq tarihy bar jáne ǵajap sáýleti týyndysy retinde kúlli musylman qaýymy úshin kieli oryn sanalatyn alyp keseneniń turaqty túrde saqtalýy men qorǵalý jaǵdaiy únemi memleket baqylaýynda.
Eske salsaq, Memleket basshysy Qasym-Jomart Toqaev 2022 jyly Túrkistan oblysyna jasaǵan saparynda Q.A.Iasaýi kesenesiniń jai-kúiimen tanysyp, eskertkishtiń saqtalýyn qatań baqylaýǵa alýdy tapsyrǵan bolatyn. Nátijesinde, ár salanyń bilikti mamandarynan quralǵan jumys toby tehnikalyq jaǵdaiyn zerdelegen.
Konferentsiianyń uiymdastyrýshysy QR Mádeniet jáne sport ministrligi, Mádeniet komitetine qarasty «Áziret Sultan» memlekettik tarihi-mádeni mýzei-qoryǵy» RMQK-niń málimdeýinshe, 2023 jyldyń 28 naýryzynda QR Úkimet tóraǵasynyń orynbasary A.Kólginovtyń tóraǵalyǵymen osy baǵytta otyrys ótkizilgen. Onda keseneni keshendi zertteý jáne tehnikalyq jai-kúiin jaqsartý jospary aiasynda naqty jumystar júrgiziletin bolyp belgilendi.
