Nur-Sultan qalasynda ótken «Ulttyq mektep lıgasy» respýblıkalyq týrnırinde Túrkistan qalasyndaǵy J.Edilbaev atyndaǵy №18 mektep-gımnazıanyń oqýshylary lıga jeńimpazy atandy, – dep habarlaıdy Dalanews.kz Túrkistan oblysy ákiminiń baspasóz qyzmetine silteme jasap.

Voleıboldan 9-11 synyp oqýshylary arasynda ótkizilgen oblystyq jarysta bıikten kórinip, elordaǵa attanǵan jas voleıbolshylar týrnır barysynda birde-bir ret jeńilmegen. Jartylaı fınalda jergilikti elordalyq komandany, al fınalda Pavlodar oblysynan kelgen qarsylastarǵa des bermeı, jeńimpaz kýbogine ıe boldy.

Aıta keterligi, osyǵan deıin Aqmola oblysynyń Shýchınsk qalasynda basketboldan 9-11 synyp uldary arasyndaǵy týrnır márege jetken bolatyn. Onda Túrkistan qalasyndaǵy Á.Naýaı atyndaǵy №13 mektep-gımnazıanyń oqýshylary laıyqty oıyn-órnekterimen daralanyp, IV orynǵa taban tiredi.