Túrkistandyq delegattar partiiany modernizatsiialaý baǵytyndaǵy bastamalarǵa qoldaý bildirdi
Partiianyń atqarýshy hatshysy Ashat Oralov saiasi uiymnyń jumysyn jandandyratyn 7 basymdyqty atap ótti. Olar: Halyqpen qarym-qatynasta keri bailanys effektivtiligin arttyrý; Jergilikti jerdegi partiia ókildikteriniń bedelin kóterý; Partiia jumysynda ashyqtyqty qamtamasyz etý; Partiialyq baqylaýdy arttyrý; Partiia bergen ýádeleriniń naqty iske asýy; Qoǵamnyń ár salasymen bailanys ornata bilý; «Jas Otan» jastar qanatyn qaita jańǵyrtý.
Parlament Májilisindegi «Nur Otan» partiiasy fraktsiiasynyń tóraǵasy Erlan Qoshanov partiia ataýyn «Amanat» dep ózgertý týraly usynys bildirdi. Memleket basshysy, Partiia Tóraǵasy Qasym-Jomart Kemeluly Toqaev bul usynysqa qoldaý bildirdi, partiianyń jańa ataýyn sezd delegattary da biraýyzdan qoldady. Jiynda partiianyń Jarǵysyna tiisti ózgerister engizilip, jańa ataýy men belgisi bekitildi.
– Biz «Jańa Qazaqstandy» qurýǵa kiristik. Bul – óte aýqymdy mindet. Partiia barlyq reformaǵa uiytqy bolýǵa tiis. Ol úshin ózgeristi aldymen ózimizden bastaýymyz kerek. Sondyqtan búgingi kún tártibindegi negizgi másele – partiiany jańǵyrtý. Zaman, qoǵam, adam ózgerip jatqanda, partiianyń ózgerýi – zańdylyq. Saiasi uiymnyń ataýyn «Amanat» dep ózgertý usynyldy. Birneshe usynys boldy, sonyń ishinen Amanat degen ataýǵa toqtadyq. Bul – elimiz úshin de, ultymyz úshin de airyqsha máni bar kieli uǵym. Egemendigimiz, eldigimiz ben birligimiz, keń baitaq jerimiz – bizge babalardan jetken amanat. Osy qasterli qundylyqtarymyzdy kózdiń qarashyǵyndai saqtap, bolashaqqa miras etýimiz kerek. Memlekettilik dástúr jalǵastyǵy, urpaq sabaqtastyǵy degenimiz – mine osy. Halqymyz eshqashan amanatqa qiianat jasamaǵan. Partiia bul qaǵidatty berik ustanady, – degen Qasym-Jomart Toqaev partiia jumysyn júieleý baǵytynda birqatar tapsyrma berdi.
Túrkistandyq delegattar sezde qabyldanǵan sheshimderdi qoldaityndaryn, tapsyrmalardy oryndaý baǵytyndaǵy jumysty kúsheitetinderin jetkizdi.
