Túrkistan oblysynyń ákimi Janseiit Túimebaev óńirdegi birqatar sáýletshilermen kezdesti. Basqosýda oblys ortalyǵyn damytý jaiy jan-jaqty talqylandy.
Jiyn barysynda aimaq basshysy Túrkistan qalasyn túrki áleminiń mádeni-rýhani ortalyǵy retinde damytý boiynsha bas jospar tujyrymdamasyn ázirleý konkýrsy uiymdastyrylǵanyn atap ótti.
«Qalamyzdy týristik ortalyqqa ainaldyrý maqsatynda uiymdastyrylǵan baiqaýǵa otandyq jáne sheteldik mamandar qatysty. Atap aitqanda, Túrkiia, Ońtústik Koreia, Ózbekstan elderinen 42 kásibi sáýletshiler baqtaryn synady.
Biraq, hattamaǵa sáikes 22 joba joldandy. Olarǵa qoiylyp otyrǵan basty talap, qaladaǵy jańa qurylys sáýlet stili jergilikti ulttyq salt-dástúrge sai bolýy tiis.
Sondai-aq, qalanyń barlyq tusynan Qoja Ahmet Iassaýi kesenesi kórinip turýy kerek. Munymen másele sheshilmeidi. Túrkistan oblysynyń qaryshtap damýy bizdiń eren eńbegimizge tikelei bailanysty. Sondyqtan, el erteńi úshin, balalarymyzdyń bolashaǵy úshin ortaq jumystardy atqaryp, jan-jaqty qosylýymyz qajet», dedi – Janseiit Qanseiituly.
Sondai-aq, oblys ákimi Túrkistan qalasynda Elbasynyń usynysymen birqatar Ulttyq kompaniialar, biznes ókilderi men sheteldik investorlar 30-ǵa jýyq áleýmettik jáne kásipkerlik nysan salatynyn jetkizdi.
Odan bólek, joba aiasynda týrister men jergilikti halyqqa qyzmet kórsetetin meiramhanalar, dámhanalar men arbattar salynbaq. Búginde boi kóteretin nysandardyń eskizdik jobalaryna halyqaralyq konkýrs jariialanǵan. Óńir basshysy sáýletshilerdi qalany damytýǵa bailanysty usynys bildirýge jáne jariialanǵan baiqaýǵa belsendi qatysýǵa shaqyrdy.
