R. Seıtmetov atyndaǵy Túrkistan sazdy-drama teatrynda ótetin sharanyń ashylý rásimine oblystyq mádenıet basqarmasy basshysynyń orynbasary Asylhan Temirhanuly arnaıy qatysyp, qatysýshylarǵa sáttilik tiledi.
– Basqa óner túri sıaqty teatr óneri de qoǵamdyq oı-sananyń negizgi bir formasy bolyp sanalady. Halyqtyq teatrynyń quramynda bir kezderi men de birneshe ról oınaǵan edim. Sondyqtan árbir ujymnyń eńbegin baǵalaımyn jáne barlyq qatysýshyǵa sáttilik tileımin, – dedi A.Temirhanuly.
Festıvál maqsaty – tarıhı qoıylymdardy sahnalaý, teatrlardyń repertýarynda otansúıgishtikke tárbıeleıtin, patrıottyq rýhty oıatatyn shyǵarmalardyń oryn alýyna jáne oblystaǵy «Halyqtyq» (Úlgili) ataǵy bar teatrlardyń ónerin nasıhattaý, bir-birimen is-tájirıbe almasý jáne shyǵarmashylyq baılanystardy nyǵaıtý, tyǵyz qarym-qatynasta bolýyna yqpal etý.
Úsh kúnge sozylatyn teatrlar saıysyna oblysqa qarasty aýdan-qalalardan 15 teatr qatysady. Óner ujymdarynyń jumysyn jazýshy, rejıser, dramatýrg, teatr pedogogi Asylbek Ihsanov, QR Eńbek sińirgen qaıratkeri, Q.Qýanyshbaev atyndaǵy Memlekettik akademıalyq qazaq mýzykalyq drama teatrynyń aktrısasy Aınur Bermýhambetova jáne Ónertaný ǵylymdarynyń magıstri, teatrtanýshy Tımýr Ahmetov baǵalap, qazylyq etedi.
Aıta keteıik, óner saıysynda top jarǵan óner ujymyna Bas júlde, İ oryn, İİ oryn, İİİ oryn ıelerine, sondaı-aq «Úzdik rejıserlik sheshim», «Úzdik er adam róli», «Úzdik áıel adam róli», «Úzdik epızodtyq róli», «Úzdik mýzykalyq bezendirilgen qoıylym», «Úzdik qoıýshy-sýretshi» nomınasıalaryna baǵaly syılyqtar taǵaıyndalǵan.
