Túrkistanda salyqshylardyń jańa ǵimaraty ashyldy
– Túrkistan oblysy qurylyp, Túrkistandy Túrki áleminiń ortalyǵyna ainaldyrý mindeti júktelgeli 2-3 jyldyń ishinde qala adam tanymastai ózgerdi. Qalanyń damýyna qomaqty qarjy quiylyp jatyr. 2018 jyly osyndaǵy qyzmetkerler memlekettik qyzmetti bir kúnge toqtatpai, Shymkentten Túrkistanǵa kóship keldi. Sol kezde bárine jaqsy ǵimarat jetpedi. Búgin tiisti qarjy bólinip, qurylysy zaman talabyna sai júrgizilgen zamanaýi ǵimarattyń ashylýyna kelip turmyz. Biyl el Táýelsizdiginiń 30 jyldyǵy merekelenip jatyr. Sonymen birge memleketimizdiń qarjy sektorynyń jumys istei bastaǵanyna 100 jyl tolyp otyr. Osynaý merekeler qarsańynda ashylǵan ǵimaratpen barshańyzdy quttyqtaimyn. Eldiń, memlekettiń igiligine jarai bersin, – dedi E.Jamaýbaev.
Túrkistan oblysy ákiminiń orynbasary Arman Sábitov «Túrkistan oblysynda 3 jylda 250-den astam nysan boi kóterdi. Kiris kólemi de ulǵaiyp otyr. Bul jetistikterde sizderdiń de eńbekterińiz» dep departamenttiń jumysyna sáttilik tiledi.
Ǵimarattyń jalpy alańy – 12507 sharshy metr. Jumys isteýge tolyq jaǵdai jasalyp, sońǵy úlgidegi tehnikalyq qural-jabdyqtarmen qamtylǵan. Mańyzdy jiyndardy ótkizýge arnalǵan 320 oryndyq úlken jáne 45 oryndyq kishi májilis zaly qarastyrylǵan. Kishi májilis zalynda onlain jinalystar ótkizýge tolyq múmkindik bar. Sonymen birge ǵimaratta turǵyndar úshin 100 oryndyq kútý zaly jáne salyq tóleýshilerdi bir mezgilde qabyldaityn 14 tereze bar. Taǵy bir ereksheligi, ǵimarat ishinen qyzmetkerlerge arnalǵan ashana, arnaiy sport kesheni de qarastyrylǵan. Munda jumystan tys ýaqytta dene shynyqtyrýmen ainalysyp, shaǵyn fýtbol, basketbol jáne voleibol oinaýǵa bolady.
El Táýelsizdiginiń 30 jyldyq merekesi qarsańynda paidalanýǵa berilgen jańa ǵimaratta Túrkistan oblysy boiynsha Memlekettik kirister departamenti men Túrkistan qalasy boiynsha memlekettik kirister basqarmasynyń 207 qyzmetkeri ornalasty.
