Búgin Túrkistanda Respýblika kúnine arnalǵan «Jasa, jaina, Qazaqstan!» saltanatty is-sharasy ótti. «Tulǵalar» prologymen ashylǵan merekelik keshte ulttyq merekeniń mán-mazmuny jan-jaqty aishyqtaldy. Qazaqstan Respýblikasynyń Memlekettik Gimni oryndaldy. Jiynǵa oblys ákimi Darhan Satybaldy arnaiy qatysyp, óńir turǵyndaryn quttyqtady. Sonymen qatar óńirde atqarylǵan jumystarǵa toqtalyp, aldaǵy josparlardy da baiandady, – dep habarlaidy Dalanews.kz Túrkistan oblysy ákiminiń baspasóz qyzmetine silteme jasap.
– Elimiz úshin bul merekeniń erekshe tarihi máni bar. Memleket Basshysynyń Ulytaýda ótken quryltaidaǵy sheshiminen keiin Respýblika kúni ulttyq merekesin jańa mazmunda atap ótýdemiz. 1990 jyly 25 qazanda qabyldanǵan deklaratsiia Qazaqstannyń táýelsiz memleket retindegi saiasi-quqyqtyq negizderine jol ashty. Biz egemendik jyldary qiyndyqtar men syn-qaterlerdi birge eńserdik. Taiaýda Prezidentimiz Túrkistan óńirine jasaǵan saparynda birqatar áleýmettik jáne óndiristik nysandardy aralady. Oblystyń rýhani, mádeni tynysymen jáne iske asyrylyp jatqan investitsiialyq jobalarmen tanysty. Qolǵa alynǵan jumystardy joǵary baǵalady. Sonyń ishinde Túrkistannyń taza ári kórikti qalaǵa ainalǵanyn atap ótti.
Bul – bárimizdiń ortaq jemisimiz. Óńir jurtshylyǵy týǵan jerge jáne qorshaǵan ortaǵa qurmetpen qaraýdy paryzy ekenin uǵyndy. Osy rette, Memleket basshysynyń «Taza Qazaqstan» bastamasynyń róli orasan ekenin jetkizgim keledi. Túrki áleminiń astanasy, qasietti Túrkistan shahary Prezidenttiń bastamasymen endi jańa statýsqa ie bolýda. Barshańyzdy taǵy da Respýblika kúnimen quttyqtaimyn! Ár shańyraqqa amandyq, molshylyq, baq-bereke tileimin! Qazaqstannyń táýelsizdigi máńgilik bolsyn! – dedi oblys basshysy Darhan Amangeldiuly.
Saltanatty jiynda oblystaǵy birqatar adamdardyń eńbegi elendi. Ulyq merekege orai oblystyń áleýmettik-ekonomikalyq damýyna úles qosqan belsendi tulǵalar III dárejeli «Barys» ordeni, «Parasat» ordeni, «Qurmet» ordeni, III dárejeli «Eńbek dańqy» ordeni, «Erligi úshin» medali, «Eren eńbegi úshin» medali, «Shapaǵat» medali, «Qazaqsattyń eńbek sińirgen ustazy» ataǵy syndy memlekettik nagradalarmen marapattaldy. Memleket basshysy «eńbekqor adam», «kásibi maman» beinesine basa mán berýde. Shynaiy, adal eńbegimen qoǵamǵa syily bolǵan úlgili tulǵalar memleketimizdiń qurmetine bólenip, eldiń maqtanyshyna ainalyp keledi.
Oblystyń damýynda barlyq salalar boiynsha oń kórsetkishter bar. Jalpy óńirlik ónim kólemi 9 aida 3,7 trln.teńgege jetti. Biz negizgi basymdyqty jańa jumys oryndaryn ashýǵa baǵyttap otyrmyz. Sol maqsatta Saýran aýdanynda 100 gektar aýmaqqa «shaǵyn ónerkásip park» jobasyn júzege asyrdyq. Búgingi tańda, parkte 10 óndiristik ǵimarattyń qurylysy aiaqtalyp, 8 iri joba iske qosyldy. Biylǵy 9 aida oblysymyzǵa 822 mlrd.teńge investitsiia tartyldy.
Ótken jylmen salystyrǵanda 1,2 esege artty. Aýyl sharýashylyǵynda 747,3 mlrd. teńgeni quraityn ónim óndirilip, Túrkistan oblysy respýblikada kóshbasshy orynda. Naryqty otandyq ónimdermen qamtamasyz etýmaqsatynda 26 joba iske qosylyp, 194 jumys orny ashyldy. Oblysta aq altynnyń elitalyq sorttaryn ósirýdi jáne shikizatty tereń óńdeýdi qamtityn maqta-toqyma klasterin qurý qolǵa alyndy.
Ári qarai kontserttik baǵdarlamaǵa ulasty. «Kongreess holl» kópsalaly kesheninde ótken keshti Jandos Óserbaev men Aiajan Eshtaeva tizgindedi. Merekelik jiynda respýblikalyq «Túrkistan daýysy-2024» jas oryndaýshylar baiqaýynyń birinshi oryn iegeri mańǵystaýlyq Lýiza Nurqýatova, «Voice of Turan» Halyqaralyq án baiqaýynyń Gran-pri iegeri Ciýzanna Melkonian jáne II oryn iegeri Samir Elchiev, qazaq estrdasynyń jaryq juldyzy Ǵazizhan Shekerbekov, Aizada Asylhan, R.Seitmetov atyndaǵy Túrkistan sazdy-drama teatrynyń ártisteri, «Farab» bi ansambli, saksofon, baian, violonchel aspabynda oryndaýshylar, «Jańa lep» ujymynyń ánshileri, «Samǵaý» bi ansambli men «Alqońyr» folklorlyq ansambli óner kórsetti.
