Búgin túrki áleminiń rýhanı, mádenı ortalyǵy – Túrkistanda Qala kúni merekesiniń gala-konserti ótti. Sharaǵa Túrkistan oblysy ákiminiń orynbasary Ertaı Altaev, Túrkistan qalasynyń ákimi Ázimbek Pazylbekuly qatysyp, barsha qonaqtardy quttyqtap, rýhanı astananyń álem nazaryn aýdarǵan áleýetti shaharǵa aınala berýin tiledi, – dep habarlaıdy Dalanews.kz Túrkistan oblysy ákiminiń baspasóz qyzmetine silteme jasap.
Saltanatty jıynda Respýblıka kúni merekesine oraı, óz salasynda adal eńbek atqaryp júrgen bir top eńbek adamy arnaıy marapattaldy.
Keshte elimizge tanymal estrada juldyzdary men jergilikti talantty óner ıeleri jınalǵan kópshilikke ánnen shashý shashyp, kóterińki kóńil syılady.
Bıyl da Túrkistan qalasynyń halqy mereıli merekesin keńinen toılady. Kıeli shaharda Qala kúni onkúndik sharalarmen órnektelip, ártúrli baǵytta atalyp ótti. Respýblıkalyq fýtbol týrnırinen bastalyp, sýretshiler festıvali, poezıa keshi, foto baıqaý, shahmattan ashyq birinshilik jáne Iassaýı hıkmetterin jatqa aıtý, ulttyq jáne estradalyq ánder konsertimen jalǵasty. Qala turǵyndaryna qolaıly jaǵdaı jasaý, merekelik kóńil kúı syılaý, jastardyń bos ýaqytyn tıimdi paıdalaný maqsatynda ótken sharalar barlyq sektorda uıymdastyryldy.
Aıta keteıik, búginde qala halqynyń sany 234 myńnan asyp otyr. Qalada ınvestısıa, ónerkásip, qurylys, ınfraqurylym, týrızm, bilim, densaýlyq, mádenıet, sport salalary kún saıyn qarqyndy damyp keledi. Máselen, jyl basynan beri Túrkistan qalasyna 273 mlrd teńge ınvestısıa tartylyp, ótken jylǵy kórsetkishten 110 paıyzǵa artqan. Týrızm salasy boıynsha ótken jylǵy 7 aılyq statısıka boıynsha Túrkistanǵa 461,6 myń ishki týrıs kelse, bıyl bul kórsetkish 752,1 myń adamǵa jetti. Byltyrǵy 7 aıda shetelden 6,1 myń adam kelse, bıylǵy 7 aıda 13,7 myń adamǵa jetken. Sáıkesinshe, qonaq úıler men týrısik nysandar sany da kún sanap artýda. Al aýyz sý, káriz júıesi, elektr qýatymen qamtamasy etý, abattandyrý, jol, qoǵamdyq kólik qyzmetiniń sapasy jaqsaryp, «kógildir otynmen» qamtý 98 paıyzǵa jetken.
