Investitsiialyq jobany «Turkistan Tourism City» kompaniiasy iske asyrdy, keshen qurylysy 2019 jyly jeltoqsan aiynda bastaldy. Nysan Qoja Ahmet Iassaýi kesenesine qarama-qarsy «Áziret Sultan» mádeni qoryǵynyń býferlik aimaǵynda 20,5 gektar aýmaqta ornalasqan.
Munda 4 myńnan astam turaqty jumys orny quryldy. Keshenge Jibek joly dáýirindegi saýdagerler men qolónershiler kóshesi, «ushatyn teatr», at shoýyn ótkizýge arnalǵan amfiteatr, Shyǵys bazary, saýda sóreleri men býtikter, qonaq úiler men meiramhanalar, SPA jáne fitnes-ortalyq, kinoteatr, otbasylyq oiyn-saýyq ortalyǵy kiredi. Bul rette, barlyq qurylymdar sý arnasy arqyly bailanystyrylǵan, onda sýdaǵy «qaiyq sherýi» teatrlandyrylǵan shoýy ótkiziledi. «Kerýen-sarai» kesheniniń Ortalyq Aziiada balamasy joq jáne ol Qoja Ahmet Iassaýi kesenesinen keiin óńirge týrister men investitsiialardy tartatyn basty ortalyqqa ainalýy tiis.
Úkimet basshysy oblystyq ǵylymi-ámbebap kitaphanamen tanysty. Bul aqparat pen shyǵarmashylyqqa arnalǵan biregei hab. Ǵimarattyń úsh qabaty oqý zaldary, kovorking-ortalyqtary, foto-, beine- jáne aýdiojazba, kalligrafiia, qysh óneri stýdiialary, sheberhanalary, onyń ishinde 3D-modelderdi jasaýǵa arnalǵan sheberhanalary, sondai-aq kinokontsert zaly, kofehanalary, kitap kádesyilary men qoldan jasalǵan buiymdar dúkenderi qamtylǵan zonalarǵa bólingen.
Kitaphananyń ǵylymi-zertteý ortalyǵynda kitap saqtaý qoimasy, sirek kezdesetin kitaptar men kóne zamanǵy qoljazbalardy saqtaýǵa arnalǵan bólim, qujattardy, kitaptardy tsifrlandyrý jáne konservatsiialaý tsehtary, onyń ishinde Ortalyq Aziiadaǵy totyǵýǵa qarsy jabdyqpen jabdyqtalǵan birden-bir tseh bar. Jumys sapary aiasynda Premer-Ministr sondai-aq Túrkistan qalasynda basqa da investitsiialyq jobalardyń iske asyrylý barysyn tekserdi.
