Túrkistan oblystyq «Ońtústik Qazaqstan» qoǵamdyq-saıası gazetiniń shyǵa bastaǵanyna bıyl 100 jyl tolyp otyr. Osyǵan oraı oblys ortalyǵyndaǵy «Jibek joly» saıabaǵynda «Ońtústik Qazaqstan» gazetiniń aleıasy ashyldy. Oǵan óńirdiń zıaly qaýym ókilderi men gazet redaksıasynyń ujymy qatysyp, 100 jyldyq mereıtoıǵa oraı 100 túp kóshet otyrǵyzdy.
– Gazet te adam sıaqty. Alǵashqy táı-táı basqan qadamyna el qýanady. Aıaǵyna tik turǵan ýaqytta jan-jaǵyna baıyppen qarap, eldik murat jolynda qyzmet ete bastaıdy. Sol sıaqty «Ońtústik Qazaqstan» gazeti de qanshama jyldar boıy aýyr da qıyn kúnderdi basynan ótkerdi. Gazet shyǵarýǵa qarjy tabylmaı qalǵan kezderdiń ózinde oqyrmanynan ajyraǵan joq.
Endi 100-ge kelgen shaǵynda ulttyń rýhanı shejiresine aınaldy desek artyq aıtqandyǵymyz emes. Búgin «Ońtústik Qazaqstan» gazeti aleıasnyń ashylǵanyna kýá bolyp otyrmyz. Búgingi egilgen kóshetter jaıqalyp ósip, elge saıa bolatyn úlken saıabaqqa aınalsyn degen tilekter aıtylyp jatyr. Júzge kelgen abyz basylym úshin osydan artyq tilektiń qajeti de joq, – deıdi gazettiń dırektor-bas redaktory Abaı Balajan.
Aleıanyń ashylýyna elimizdiń ár túkpirinen kelgen oblystyq gazettiń redaktorlary atsalysty. Atap aıtsaq, Mańǵystaý, Atyraý, Batys Qazaqstan oblystyq gazetterdiń redaktorlary túrkistandyq áriptesterimen birigip kóshet otyrǵyzdy.
Aıta keteıik, mazmundy is-sharalar legi erteń «Farab» ǵylymı ámbebap kitaphanasynda jalǵasady. Oblystyq «Ońtústik Qazaqstan» gazetiniń 100 jyldyq mereıtoıyna oraı saltanatty jıyn ótedi.
